اسلام آباد (نیوز ڈیسک)اسلام آباد میں تیز رفتار گاڑیوں کی مبینہ ریس کے دوران پیش آنے والے جان لیوا حادثے کی تحقیقات میں اہم پیشرفت سامنے آئی ہے۔

پولیس نے حادثے میں ملوث لینڈ کروزر کے ڈرائیور کو گرفتار کر لیا ہے، جبکہ اس کی شناخت ایک بااثر سیاسی شخصیت کے قریبی رشتہ دار کے طور پر ہوئی ہے۔

میڈیا رپورٹس کے مطابق بھارہ کہو کے علاقے اٹھال چوک میں پیش آنے والے واقعے کی سی سی ٹی وی فوٹیج بھی منظرعام پر آ گئی ہے۔ ویڈیو میں دیکھا جا سکتا ہے کہ ایک تیز رفتار لینڈ کروزر متعدد گاڑیوں اور موٹر سائیکل سواروں سے ٹکرا گئی، جس کے نتیجے میں قیمتی جانوں کا نقصان ہوا۔

پولیس حکام کے مطابق گرفتار ملزم 17 سالہ واثق ہے، جو مبینہ طور پر دوسری گاڑی کے ساتھ ریس لگا رہا تھا۔ ذرائع کا کہنا ہے کہ ملزم مسلم لیگ (ن) اسلام آباد کے ایک مقامی رہنما اور بھارہ کہو یونین کونسل کے چیئرمین کا بھانجا ہے۔

حادثے کے نتیجے میں چار افراد جان کی بازی ہار گئے جبکہ چار دیگر زخمی ہوئے، جن میں بعض کی حالت تشویشناک بتائی جا رہی ہے۔ واقعے کے بعد تھانہ بھارہ کہو میں مقدمہ درج کر لیا گیا ہے اور مزید قانونی کارروائی جاری ہے۔

تحقیقات کرنے والے ادارے حادثے کے تمام پہلوؤں کا جائزہ لے رہے ہیں تاکہ ذمہ دار افراد کے خلاف قانون کے مطابق کارروائی عمل میں لائی جا سکے۔