لندن (این این آئی)سابق وزیر اعظم و مسلم لیگ (ن) کے صدر نوا ز شریف نے کہا ہے کہ بھارت سے تعلقات سنوارے جاسکتے ہیں ، کوئی مشکل نظر نہیں آتی، اچھا ہوتا بھارتی ٹیم پاکستان آکر کھیلتی،پورا ملک دیکھنا چاہتا ہے ڈیڑھ ارب درخت، 50لاکھ نوکریاں ،300ڈیم کہاں ہیں؟۔لندن میں میڈیا سے گفتگو کرتے ہوئے لیگی صدر نے کہا کہ ہم جنیوا سے لندن پہنچے ہیں ،الحمدللہ سب خیریت ہے۔ ایک سوال پر انہوں نے کہا کہ بھارتی ٹیم کو چیمپئنز ٹرافی کھیلنے کیلئے پاکستان ضرور آنا چاہئے تھا، اچھی بات ہوتی بھارتی ٹیم پاکستان آکر کھیلتی۔
انہوں نے کہا کہ امید ہے جلد ایسا وقت آئے گا۔انہوں نے کہا کہ بھارت کے ساتھ ماضی میں تعلقات اگر بگڑے ہیں تو انہیں سنوارنے کی ضرورت ہے، ہمیں کسی سے تعلقات خراب رکھ کے کرناکیاہے؟۔ انہوں نے کہا کہ بھارت کے ساتھ تعلقات سنوارے جاسکتے ہیں مجھے کوئی مشکل نظر نہیں آتی۔ انہوں نے کہا کہ پاک امریکا تعلقات اچھے رہے ہیں اور اچھے رہنے چاہئیں۔پی ٹی آئی پر تنقید کرتے ہوئے انہوں نے کہا کہ پورا ملک دیکھنا چاہتا ہے کہ ڈیڑھ ارب درخت، 50لاکھ نوکریاں ،300ڈیم کہاں ہیں، ہمیں توکچھ نظر نہیں آتا، کوئی ایک منصوبہ بتادیں جس کا انہوں نے سنگ بنیاد رکھا ہویا افتتاح کیا ہو۔
