اسلام آباد(نیوزڈیسک)مانسہرہ کی وادیٔ سرن میں چند روز سے لاپتہ آئرش کوہ پیما الیگزینڈر کی لاش پراچہ کٹھہ کے جنگلات سے مل گئی۔
ریسکیو اہلکاروں نے لاش کو ضروری کارروائی کے لیے ہسپتال منتقل کردیا ہے۔
ریسکیو حکام کے مطابق کوہ پیما کی موت کس وجہ سے ہوئی، اس بارے میں فی الحال حتمی طور پر کچھ کہنا ممکن نہیں۔ واقعے کی مزید تفصیلات تحقیقات کے بعد سامنے آنے کا امکان ہے۔
نجی ٹی وی چینل سما نیوز کے مطابق پولیس کا کہنا ہے کہ آئرش کوہ پیما الیگزینڈر اور برطانوی کوہ پیما ایلن ڈیوڈ کوپر 28 اگست کو گلگت بلتستان سے منڈا کچہ پہنچے تھے۔
پولیس کے مطابق دونوں کوہ پیماؤں نے اسی روز تقریباً 13 ہزار 500 فٹ بلند موسیٰ کا مصلیٰ کی چوٹی سر کرنے کے لیے سفر کا آغاز کیا تھا۔
حکام کا کہنا ہے کہ برطانوی کوہ پیما ایلن ڈیوڈ کوپر تین روز قبل بحفاظت منڈا کچہ واپس پہنچ گئے تھے، تاہم الیگزینڈر واپس نہ آسکے اور ان کی تلاش جاری تھی۔
ذرائع کے مطابق دونوں کوہ پیما دوست تھے اور انہوں نے مختلف راستوں سے نیچے اتر کر واپس پہنچنے کا آپس میں مقابلہ کرنے کا فیصلہ کیا تھا۔
