اسلام آباد(این این آئی)سپریم کورٹ نے توہین قرآن اور قادیانیت کی ترویج کے مقدمہ میں سے توہین قرآن اور قادیانیت کی ترویج کی دفعات حذف کرنے کا حکم دے دیا۔نجی ٹی وی کے مطابق چیف جسٹس آف پاکستان کی جانب سے جاری فیصلے میں تحریر کیا گیا ہے کہ مذہبی آزادی اسلام کی بنیادی خصوصیات میں سے ہے ،کیس سے منسلک افراد نے قرآن پاک سے رہنمائی نہیں لی،آئین کے آرٹیکل 20کے مطابق ہر شہری کو مکمل مذہبی آزادی حاصل ہے،

آئین ہر مذہب اور فرقے کو اپنے مذہبی ادارے کھولنے کی اجازت دیتا ہے،متعلقہ حکام اگر قرآن پاک سے رہنمائی لیتے تو شاید مقدمہ ہی درج نہ ہوتا۔عدالتی فیصلے میں کہا گیا کہ ملزم مبارک ثانی کو 7جنوری 2023کو گرفتار کیا گیا تھا، ملزم کے خلاف مقدمہ چنیوٹ کے تھانہ چناب نگر میں 6دسمبر 2022کو درج کیا گیا تھا۔عدالت نے ملزم مبارک احمد ثانی کو 5ہزار روپے کے ذاتی ضمانتی مچلکے جمع کروانے کی ہدایت کردی۔