اسلام آباد(این این آئی)الیکشن کمیشن آف پاکستان نے امیدواروں کی درخواست پر انتخابی نشانات تبدیل کیے جانے کی صورت میں 8فروری کے انتخابات ملتوی ہونے کی وارننگ دے دی ہے۔ترجمان الیکشن کمیشن کے مطابق انتخابی نشان الاٹ ہونے کے بعد مختلف فورمز سے انتخابی نشان تبدیل کیے جا رہے ہیں،الیکشن کمیشن انتخابی نشانات کی الاٹمنٹ کے بعد تینوں پرنٹنگ کارپوریشنز کو بیلٹ پیپرز کی چھپائی کا آرڈر دے چکا ہے اور پرنٹنگ کا کام شروع ہو گیا ہے۔
ترجمان الیکشن نے بتایاکہ انتخابی نشان الاٹ ہونے کے بعد مختلف فورمز سے انتخابی نشان تبدیل کیے جا رہے ہیں۔الیکشن کمیشن کے مطابق اگر اسی طرح انتخابی نشانات کی تبدیلی کا عمل جاری رہا تو اس سے ایک طرف تو الیکشن میں تاخیر کا خدشہ پیدا گیا ہے کیونکہ بیلٹ پیپر دوبارہ پرنٹ کروانا پڑیں گے جس کیلئے پہلے ہی وقت محدود ہے اور دوسری طرف جو اسپیشل کاغذ بیلٹ پیپرز کیلئے مہیا ہے، وہ بھی ضائع ہو جائے گا۔ترجمان الیکشن کمیشن نے بتایاکہ 2018کے انتخابات میں 800ٹن کاغذ بیلٹ پیپر کی چھپائی کیلئے استعمال ہوا تھا جبکہ اس بار 2024کے انتخابات میں 2070ٹن کاغذ استعمال ہونے کا تخمینہ ہے، اسی طرح 2018کے انتخابات میں 11700امیدواروں نے حصہ لیا تھا جبکہ اس بار 18059امیدوار میدان میں ہیں،2018میں 220ملین بیلٹ پیپرز چھپوائے گئے تھے جبکہ اس بار 260ملین بیلٹ پیپرز چھپوائے جا رہے ہیں۔
الیکشن کمیشن کے ترجمان نے کہا کہ اس سلسلے میں الیکشن کمیشن میٹنگ کر رہا ہے کہ اس صورتحال سے کیسے نبردآزما ہوا جائے اور کمیشن کی طرف سے بار بار جو ہدایات جاری کی گئی ہیں کہ اب انتخابی نشان تبدیل نہ کیے جائیں، ان پر کیسے عمل کروایا جائے۔ترجمان نے کہاکہ اس تجویز پر بھی غور کیا جا رہا ہے کہ اگر انتخابی نشانات کو تبدیل کرنے کا یہ سلسلہ نہ رکا تو ایسے انتخابی حلقوں میں الیکشن ملتوی کرنے کے علاوہ کوئی راستہ نہیں رہے گا۔
