اسلام آباد(این این آئی)وفاقی تحقیقاتی ایجنسی نے سابق آرمی چیف قمرجاوید باجوہ کے عزیز صابر مٹھو کو طلب کرلیا۔ایف آئی اے کے مطابق صابر مٹھو کو اینٹی منی لانڈرنگ ایکٹ کے تحت 23اکتوبر کو طلب کیا گیا ہے، ان کے خلاف کال اپ نوٹس ان کی تین رہائش گاہوں پربھجوادیا ہے۔ایف آئی اے کے نوٹس کے متن میں کہا گیا کہ صابر مٹھو کے 19بینک اکائونٹس ہیں جن میں سے14اکائونٹس پاکستانی اور 5غیر ملکی بینکوں میں ہیں، ان اکائونٹس کے ذریعے 5ارب 34کروڑ روپے کی ٹرانزیکشن کی گئیں۔

نوٹس میں کہا گیا کہ جن ممالک کا دورہ کیا ان کی تفصیلات، اپنی آف شور اور شیل کمپنیوں کا تمام ریکارڈ بھی ساتھ لائیں۔ایف آئی اے نوٹس میں ہدایت کی گئی ہے کہ اندرون اوربیرون ملک جائیدادوں اور گاڑیوں کی تفصیلات بھی ساتھ لائیں، فارن کرنسی کی خریدوفروخت کا تمام ریکارڈ بھی ساتھ لائیں۔ایف آئی اے نوٹس میں کہا گیا کہ آپ اور آپ کی فیملی نے جو غیرملکی کرنسی ائیرپورٹس پر ڈکلیئر کی اس کی تفصیلات بھی فراہم کریں۔نوٹس کے متن کے مطابق ان ہدایات پر عمل نہ کرنے کی صورت میں سخت کارروائی عمل میں لائی جاسکتی ہے۔