اسلام آباد (این این آئی)سعودی عرب نے افغان شہریوں کے 12 ہزار سے زیادہ جعلی پاسپورٹ پاکستانی سفارتخانے بھجوا دئیے۔افغان شہریوں کو مبینہ پاکستانی شناختی کارڈاور پاسپورٹس کے اجراء کی تحقیقات شروع کردی گئی ہیں اسی حوالے سے سعودی عرب نے افغان شہریوں کے 12 ہزار سے زیادہ پاسپورٹ پاکستانی سفارتخانے بھجوا دیے۔واضح رہے کہ گزشتہ دنوں سعودی عرب میں 12 ہزار افغانوں سے جعلی پاکستانی پاسپورٹس کی برآمدگی کی تحقیقات کے لیے کمیٹی بنائی گئی تھی۔
ذرائع کے مطابق وزارت داخلہ نے ڈی جی پاسپورٹ امیگریشن مصطفیٰ جمال کی سربراہی میں 5 رکنی کمیٹی بنائی جس میں وزارت داخلہ، نادرا اورایف آئی اے کے سینئرافسران کو شامل کیا گیا ہے جب کہ کمیٹی میں پاسپورٹ امیگریشن کا ایک افسر سیکرٹری کے فرائض سرانجام دے گا۔ذرائع کے مطابق کمیٹی 15 دنوں میں جعلی پاسپورٹس کے اجراء کے کرداروں اور اس کی روک تھام پرسفارشات دے گی اور کمیٹی سعودی عرب بھیجے جانے پر نادرا، ایف آئی اے اور پاسپورٹ افسران کی ذمہ داری بھی طے کرے گی۔یاد رہے کہ افغان شہریوں کو بڑی تعداد میں پاکستانی پاسپورٹ جاری کرنے کا انکشاف ہوا تھا جس کے بعد سعودی عرب نے 12 ہزار افغان شہریوں سے پاکستانی پاسپورٹ بر آمد کر لیے تھے۔
