اسلام آباد (این این آئی)سعودی عرب میں دو پاکستان ہاؤس بنانے کا فیصلہ کرلیا گیا ہے۔ وفاقی وزیر مذہبی امور انیق احمدنے تصدیق کی کہ پاکستان ہاؤس مکہ مکرمہ اور مدینہ منورہ میں بنائے جائیں گے،حرم کی توسیع کے سبب سعودی عرب میں موجود دو پاکستان ہاؤس منہدم کردیئے گئے تھے۔ وفاقی وزیر کے مطابق دو پاکستان ہاؤسز کے حوالے سے سعودی حکومت کے ذمہ پاکستان کے سات اعشاریہ ایک(7.1) ملین ریال واجب الادا ہیں۔ انیق احمد کے مطابق مکہ مکرمہ اور مدینہ منورہ میں دو پاکستان ہاؤس بنانے کی تیاریاں کی جارہی ہیں۔
انیق احمد نے کہاکہ سعودی حکام سے اراضی مل جائے تو پاکستان ہاؤسز تعمیر کرلیں گے۔انیق احمد نے کہاکہ امکان ہے کہ مکہ اور مدینہ میں دو عمارتیں مل جائیں گی۔انیق احمدنے کہاکہ پاکستان ہاؤسز کی موجودگی سے پاکستانی عازمین کو بہتر سہولیات میسر آسکیں گی۔انہوںنے کہاکہ 2024 کا حج پاکستانیوں کے لیے بڑی تبدیلیاں لے کر ائے گا،خواتین کو آئندہ برس دو خصوصی اسکارف فراہم کیے جائیں گے۔انیق احمد نے کہاکہ ان اسکارف پر قومی پرچم بنایا جائے گا تاکہ خواتین کی بطور پاکستانی شناخت ہو سکے۔
