لاہور( این این آئی)مسلم لیگ (ن) نے قومی سلامتی کے اداروں کے بارے میں ہرزہ سرائی پر عمران خان اور شیخ رشید کے خلاف قانونی کاروائی اور ان کے نام ای سی ایل پر ڈالنے کے مطالبے کی قرارداد پنجاب اسمبلی سیکرٹریٹ میں جمع کر ادی گئی
۔رکن سمیرا کومل،سعدیہ تیمور اور حناپرویز بٹ کی جانب سے جمع کرائی گئی مشترکہ قرارداد کے متن میں کہا گیا ہے کہ عمران خان نے ایبٹ آباد جلسے میں قومی سلامتی کے اداروں کے خلاف نفرت انگیز الفاظ کا استعمال کیا گیا، عمران خان کے بیان پرپوری قوم میں شدید غم و غصہ پایا جا رہا ہے،عمران خان کا بیان ملک کے خلاف سازش کے زمرے میں آتا ہے،شیخ رشید بھی مسلسل اشتعال انگیز بیانات دے کر قوم میں تقسیم پیدا کرنے کی کوشش کررہے ہیں،جو شخص وزارت عظمی کے عہدے پر رہ چکا ہو اس کو قومی سلامتی اداروں کے خلاف ایسی گفتگو زیب نہیں دیتی،کوئی بھی محب وطن شہری اداروں کے خلاف بیانات کو برداشت نہیں کرے گا۔ مطالبہ ہے کہ عمران خان اور شیخ رشید کے خلاف فوری قانونی کاروائی عمل میں لائی جائے اور وفاقی حکومت سے مطالبہ عمران خان اور شیخ رشید کے نام ای سی ایل میں ڈالے جائیں ۔
