راولپنڈی (این این آئی)پاک فوج کے سربراہ جنرل قمر جاوید باجوہ نے ایک روزہ دورے افغانستان کے دوران پیر کو صدر اشرف غنی کیساتھ دوطرفہ دلچسپی کے امور ، افغان امن عمل کی تازہ صورتحال ، دونوں ممالک کے درمیان سیکورٹی اور دفاعی تعاون پر تبادلہ خیال کیا ۔ پاک فوج کے تعلقات عامہ (آئی ایس پی آر)کے مطابق صدر اشرف غنی کیساتھ ملاقات میں برطانیہ کے
آرمی چیف نکولس پیٹرک کارٹر بھی موجود تھے ۔آئی ایس پی آر کے بیان کے مطابق ملاقات میں سرحد پر موثر انتظامی اقدامات اٹھانے پر زور دیا گیا ۔آرمی چیف نے اس موقع پر اس عزم کا اظہار کیا کہ ایک پر امن افغانستان کا مطلب پر امن خطہ اور بالخصوص ایک پر امن پاکستان ہے ۔انہوںنے کہاکہ پاکستان ہمیشہ افغانوں کی قیادت میں امن عمل کی حمایت کر تا رہے گا ۔انہوں نے اس بات پر زور دیا کہ امن عمل پر تمام فریقین کا یکساں موقف ہونا چاہیے ۔اس موقع پر افغان صدر نے مفید بات چیت پر پاکستان کے آرمی چیف کا شکریہ ادا کیا ۔افغان صدر نے افغان امن عمل میں پاکستان کی مخلصانہ اور مثبت کر دار کو سراہا ۔اس کے بعد آرمی چیف نے مصالحتی کونسل کے سربراہ ڈاکٹر عبد اللہ عبد اللہ کے ساتھ بھی افغان امن عمل سے متعلق امور پر گفتگو کی ۔ آئی ایس پی آر کے بیان کے مطابق ملاقات میں آئی ایس آئی کے سربراہ لیفٹیننٹ جنرل فیض حمید بھی موجود تھے ۔
