لاہور (آن لائن، این این آئی) پاکستان مسلم لیگ ن کے رہنما اور اپوزیشن لیڈر پنجاب اسمبلی حمزہ شہباز کی لاہور ہائیکورٹ سے دو مقدمات میں ضمانت پر رہائی کے لئے وزیراعظم عمران خان کی اہلیہ اور خاتون اوّل بشریٰ بی بی کے قریبی رشتہ دار حمزہ شہباز کے ضمانتی بن گئے۔ جن کی تعداد 3 ہے ،بتایا گیا ہے کہ مذکورہ ضمانتیوں نے حمزہ شہباز
کی رہائی کے لئے ایک ایک کروڑ روپے مالیت کے دو مچلکے احتساب عدالت میں جمع کروائے۔ حمزہ شہباز کے ضمانتیوں میں خاتون اوّل بشریٰ بی بی کے ایک کزن مسعود اختر،بشریٰ بی بی کے بھتیجے عدیل علی خان اور خاتون اوّل کے کزن مسعود اختر کے داماد ادریس بھٹی شامل ہیں۔ ادریس بھٹی کے بارے میں بتایا گیا ہے کہ وہ پنجاب اسمبلی میں لیگی خاتون ایم پی اے عنیزہ فاطمہ کے شوہر بھی ہیں۔ یہ بھی بتایا گیا ہے کہ پوچھنے پر بشریٰ بی بی کے قریبی عزیزوں اور حمزہ شہباز کے ضمانتیوں کا کہنا تھا کہ وہ حق اور سچ کے ساتھ ہیں اور انہیں جو بہتر لگا انہوں نے وہ کام کیا ہے۔ انہوں نے کہا کہ بشریٰ بی بی کے قریبی عزیز ہونے کا یہ مطلب نہیں کہ سچ کا ساتھ نہ دیا جائے۔ سیاست میں کوئی چیز حرف آخر نہیں ہوتی۔ سابق گورنر سندھ زبیر احمد بھی تو حکومتی وفاقی وزیر اسد عمر کے حقیقی بھائی ہیں جبکہ ہر شخص کا سیاسی نظریہ اپنا ہوتا ہے۔دوسری جانب پنجاب اسمبلی میں قائد حزب اختلاف حمزہ شہباز کی رہائی کے موقع
پر شریف خاندان کے افراد بھی کوٹ لکھپت جیل پہنچے ۔ ذرائع کے مطابق حمزہ شہباز کی اہلیہ رابعہ ،بہن جویریہ ،شہباز شریف کی بہن کوثر، اہلیہ تہمینہ درانی، بھتیجا یوسف عباس، ماریہ یوسف اور سائرہ یوسف اورمیاں وقار جیل پہنچے اور حمزہ شہبازسے ملاقات کر کے انہیں مبارکباد دی ۔۔ ذرائع کے مطابق پارٹی کے ڈپٹی جنرل سیکرٹری عطا اللہ تارڑ اور حمزہ شہباز کے وکلاء نے بھی جیل میں ان سے ملاقات کی ۔
