اسلام آباد(مانیٹرنگ ڈیسک، این این آئی ) وفاقی وزیر انسانی حقوق ڈاکٹر شیریں مزاری نے اپنے ایک انٹرویو میں انکشاف کیا ہے کہ ان کو خبر ملی ہے کہ پی ڈی ایم کو سیاسی عدم استحکام پیدا کرنے کے لیے بیرون ملک سے فنڈنگ مل رہی ہے۔وفاقی وزیر نے کہا کہ اطلاعات ہیں کہ اس

فنڈنگ کے ٹھوس ثبوت بھی موجود ہیں اگر تحقیقات پر یہ سب سچ نکلے تو حکومت کے پاس کارروائی کے علاوہ کوئی چارہ موجود نہیں ہوگا۔ انہوں نے اس حوالے سے پی ڈی ایم کے خلاف کارروائی کرنے کا عندیہ بھی دے دیا۔وزیر برائے انسانی حقوق شیریں مزاری نے کہا کہ یہ فنڈنگ کہاں سے آ رہی ہے اور کون کر رہا ہے اس پر تحقیقات کرنا تو وزارت داخلہ کا کام ہے مگر ابھی تک کابینہ میں یہ اطلاعات موصول ہوئی ہیں کہ فنڈنگ ہو رہی ہے۔انہوں نے کہا کہ ہر کوئی جانتا ہے کہ بیرون ملک بیٹھے پاکستان مخالف گروہ ایسے کام کرتے رہتے ہیں مگر ہمارے ملک کے لوگوں کا ان کا آلہ کار نہیں بننے دیا جائے گا۔ کیونکہ صاف ظاہر ہے کہ اس طرح کے جلسے کرنے کے لیے اخراجات کی ضرورت تو رہتی ہے اور یہ سب پیسہ باہر سے آ رہا ہے۔دریں اثناوفاقی وزیر سائنس و ٹیکنالوجی فواد چوہدری نے کہا ہے کہ پی ڈی ایم والوں کی سٹیرنگ کمیٹی کا سٹیرنگ کسی اور کے پاس ہے۔ اپنے بیان میں فواد چوہدری نے کہاکہ پی ڈی ایم

والوں کی سٹیرنگ کمیٹی کا سٹیرنگ کسی اور کے پاس ہے، انجن کسی اور کے کنٹرول میں ہے جبکہ بریکس کسی اور کے پاؤں کے نیچے ہیں، ڈرائیور پختہ نہیں ہے، فواد چوہدری نے کہاکہ لندن سے پی ڈی ایم کا گیئر لگانے والوں کی ہینڈ بریک کراچی والے کھینچ دیتے ہیں، پی ڈی ایم کی گاڑی کا حادثے سے دوچاد ہونا یقینی ہے۔