اسلام آباد (مانیٹرنگ + این این آئی) تحریک انصاف کے اہم رہنما جہانگیر ترین وزیراعظم عمران خان کے کہنے پر واپس پاکستان آ رہے ہیں، اس بات کا انکشاف معروف صحافی عارف حمید بھٹی نے اپنے تبصرے میں کیا، انہوں نے کہا کہ میری جہانگیر ترین سے بات ہوئی ہے،

جہانگیر ترین کو وزیراعظم عمران خان نے پیغام بھیجا ہے کہ مجھ سے غلطی ہوئی ہے۔ معروف صحافی نے کہا کہ نومبر کے وسط میں جہانگیر ترین وطن واپس آ جائیں گے۔ جہانگیر ترین کے بقول عمران خان کو احساس ہوا ہے کہ ان سے زیادتی ہوئی ہے۔ معروف صحافی نے کہا کہ عمران خان کے قریبی حلقوں کو بھی احساس ہوا ہے کہ جہانگیرترین کے ساتھ زیادتی ہوئی ہے۔یاد رہے کہ پاکستان تحریک انصاف کے مرکزی رہنما جہانگیر ترین نے وطن واپسی کا اعلان کردیا ہے۔میڈیا رپورٹس کے مطابق جہانگیر ترین کا کہنا ہے کہ رواں ماہ پاکستان واپس آرہا ہوں، علاج کی غرض سے بیرون ملک آنا پڑا، واپس آکر معاملات دیکھوں گا۔ذرائع کا کہنا ہے کہ جہانگیر ترین نے پاکستان واپسی کیلئے بکنگ کرالی ہے، جہانگیر ترین 7 ماہ پہلے پاکستان سے لندن پہنچے تھے۔جہانگیر ترین 7ماہ سے ہیمپشائر کنٹری ہوم میں مقیم ہیں، وہ شوگر کمیشن کی رپورٹ جاری ہونے کے بعد سے بیرون ملک مقیم ہیں۔ذرائع کے مطابق جہانگیر ترین نے برطانیہ میں قیام کے دوران کوئی سیاسی ملاقات نہیں کی۔