اسلام آباد(آن لائن) احتساب عدالت کورٹ روم نمبر دو کے جج اعظم خان کی عدالت نے سابق صدر آصف زرداری پر مزید دو نیب ریفرنسز میں فرد جرم عائد کردی۔ سابق صدر آصف زرداری احتساب عدالت کے رو برو پیش ہوئے آصف زرداری نے صحت جرم سے انکار کر دیا ۔احتساب عدالت کے جج اعظم خان کی عدالت میں آصف زرداری سمیت دیگر ملزمان کی حاضری لگوائی گئی
جبکہ گزشتہ سماعت پر غیر حاضر ملزم شیر علی بھی عدالت میں پیش ہوا ۔ملزم نے عدالت کو بتایا کہ شدید بیماری کی وجہ سے گزشتہ سماعت پر حاضر نہ سکا آپ سے التماس ہے کہ رحم کیا جائے عدالت نے ریمارکس دیئے کہ آپ کی بڑی عمر کو دیکھ کر آپ کے ورانٹ گرفتاری منسوخ کرتے ہیں دورانِ سماعت سابق صدر آصف زرداری اور دیگر ملزمان کو پارک لین اور ٹھٹھہ واٹر سپلائی ریفرنس کی چارج شیٹ دی گئی جبکہ ملزمان کو فرد جرم کی نقول بھی فراہم کی گئیں ۔عدالت نے سابق صدر پر پارک لین اور ٹھٹھہ واٹر سپلائی ریفرنس میں فرد جرم عائد کردی ۔پارک لین ریفرنس میں 19 اور ٹھٹھہ واٹر سپلائی ریفرنس میں کل 15 ملزمان پر فرد جرم عائد کی گئی ۔تمام ملزمان فرد جرم عائد ہونے پر صحت جرم سے انکار کر دیا ۔عدالت نے پارک لین ضمنی ریفرنس میں نیب کو 20 اکتوبر اور ٹھٹھہ واٹر سپلائی ریفرنس میں 21 اکتوبر کو گواہ پیش کرنے کی ہدایت کردی پارک لین ریفرنس میں نبیل ظہور، احسن اسلم اور عبدالکبیر جبکہ ٹھٹھہ واٹر سپلائی ریفرنس میں عمران محمود، علی رضا اور طارق منیر بطور گواہ بیان ریکارڈ کروائیں گے۔ یاد رہیکہ اس سے قبل 28 ستمبر کو احتساب عدالت نے میگا منی لانڈرنگ کیس میں آصف زرداری اور ان کی ہمشیرہ فریال تالپور پر فرد جرم عائد کی تھی جبکہ ایک ملزم شیر علی کی عدم حاضری پر فرد جرم عائد نہ سکی تھی
