اسلام آباد(مانیٹرنگ ڈیسک)سی پیک کو متنازع بنانے کے لیے بھارت ایڑی چوٹی کا زور لگانے میں مصروف ہے۔سی پیک کے چیئرمین لیفٹیننٹ جنرل ریٹائرڈ عاصم سلیم باجوہ پر الزامات لگانے والے سابق بھارتی میجر گورو آریا نے خود ہی سب کچھ اگل دیا۔

”را” کے لیے کام کرنے والے سابق بھارتی میجر گورو آریا نے کہا ہے کہ لیفٹیننٹ جنرل ریٹائرڈ عاصم سلیم باجوہ سے متعلق ڈیٹا ایک پاکستانی نے فراہم کیا۔20سے 50 ہزار کے بدلے سب کچھ معلوم ہو جاتا ہے۔ایس ای سی پی اور نادرا سے باجوہ فیملی کے بارے میں ریکارڈ نکالا۔گورو آریا نے کہا کہ انہیں معلومات بھارت سے نہیں بلکہ پاکستان سے ملتی ہیں۔یاد رہے کہ صحافی احمد نورانی کی جانب سے کچھ ہفتے قبل ایک خبر شائع کی گئی تھی جس کے مطابق سابق ڈی جی آئی ایس پی آر عاصم باجوہ کے اہل خانہ نے چار ممالک میں 99 کمپنیاں بنائیں، جن میں 133 ریستورانوں کے ساتھ پیزا فرنچائز بھی شامل ہے۔کئی کمپنیوں میں عاصم سلیم باجوہ کی اہلیہ بھی شراکت دار رہیں۔ بعد ازاں عاصم سلیم باجوہ نے وضاحت دیتے ہوئے الزامات کو جھوٹا قرار دیا، اپوزیشن کی جانب سے بھی اس معاملے کو خوب اچھالا گیا، پیپلز پارٹی نے اسی سلسلے میں تحقیقات کیلئے سپریم کورٹ میں ایک درخواست دائر کرنے کا فیصلہ کیا ہے ۔