اسلام آباد(مانیٹرنگ ڈیسک، آن لائن )اسلام آباد کی احتساب عدالت نے منی لانڈرنگ ، پارک لین اور واٹر سپلائی ضمنی ریفرنسز میں سابق صدر آصف زرداری ،ان کی ہمشیرہ فریال تالپور سمیت دیگر ملزموں پر فردجرم عائد کردی، نجی ٹی وی کے مطابق احتساب عدالت میںسابق صدر آصف زرداری،ان کی ہمشیرہ فریال تالپور اور دیگر ملزموں پر منی لانڈرنگ ، پارک لین اور واٹر سپلائی ضمنی ریفرنسزپر فرد جرم عائد کرنے کیلئے سماعت ہوئی ، احتساب عدالت کے جج اعظم خان نے سماعت کی،عدالت نے آصف زرداری ،ان کی ہمشیرہ فریال تالپور سمیت دیگر ملزموں پر فردجرم عائد کردی، ملزموں
نے عدالت کے سامنے رو برو صحت جرم سے انکار کردیا۔انور مجید پر ویڈیولنک کے ذریعے فرد جرم عائد کی گئی ،ملزم انور مجید نے بھی صحت جرم سے انکارکردیا۔اس سے پہلے احتساب عدالت اسلام آباد میں سابق صدر آصف زرداری اور اْن کی ہمشیرہ فریال تالپور کی پیشی کے موقع پر سکیورٹی کے نام پر عوام کو تنگ کیا گیا،صحافیوں اور وکلا کو نیب کورٹ جانے سے روک دیا گیا اور سیکیورٹی اہلکاروں کی جانب سے کہا گیا کہ ہمیں اوپر سے احکامات ملے ہیں کہ کسی کو احتساب عدالت کے اندر نہیں جانے دینا، سکیورٹی کے نام پر نیب پراسیکیوٹر سردار مظفر عباسی ،سہیل عارف، عرفان بھولا، مرزا عثمان کو بھی جانے سے بھی روک دیا گیا، احتساب عدالت کے چاروں اطراف خاردار تاریں لگا دی گئی، جی ٹین اشارے سے احتساب عدالت کی طرف جانے والی اے کے بروہی روڈ بند کر دی گئی ،لوگ ذلیل و خوار ہو کر رہ گئے، ٹریفک کو مختلف روٹس پر ڈائیوریشن دی گئی جس کی وجہ سے بدترین ٹریفک جام رہی۔
