اسلام آباد( آن لائن) محرم الحرام میں امن و امان کی فضاء قائم رکھنے کیلئے وفاقی دارالحکومت اسلام آباد میں تین دن ڈبل سواری پر پابندی عائد کردی گئی۔ پابندی کا اطلاق 8محرم سے 10محرم الحرام تک ہوگا جس کا مقصد شہر میں امن و امان کا نفاذ یقینی بنانا ہے۔

ڈپٹی کمشنر حمزہ شفقات کی طرف سے جاری نوٹی فکیشن میں بتایا گیا ہے کہ جڑواں شہروں راولپنڈی اسلام آباد میں محرم کے جلوس کے دوران سکیورٹی اور ٹریفک کی روانی کو برقرار رکھنے کیلئے انتظامات کو حتمی شکل دے دی گئی ہے جس میں کورونا کے دوران اپنائے گئے ایس او پیز کو بھی مد نظر رکھا گیا ہے۔ ٹریفک پولیس کی جانب سے شہرمیں ٹریفک کی روانی کو برقرار رکھنے کیلئے 600سے زائد جوان تعینات کیے جائیں گے جبکہ علما کرام سے گزارش کی گئی ہے کہ عاشورہ کے دوران مذہبی رواداری کے فروغ اور کرونا سے متعلق ایس ا و پیز پر عمل در آمد کیلئے اپنا کردار ادا کریں۔نوٹیفکیشن کے مطابق محرم الحرام کے ماہ مقدس میں8 محرم الحرام سے لے کر 10 محرم الحرام تک موٹر سائیکل پر ڈبل سواری پر پابندی لگانے کا فیصلہ کیا گیا ہے تاکہ کوئی نا خوشگوار واقعہ پیش نہ آ سکے۔پابندی کے دوران خواتین، مریض، صحافی اور 50سال سے اوپر کے لوگ ڈبل سواری کی پابندی سے مبرا ہوں گے جبکہ ہر شہری جس کی عمر 18 سال یا اس سے اوپر ہو گی اس کے پاس شناختی کارڈ رکھنا لازمی ہو گا ۔

موضوعات:اسلام آباد