اسلام آباد/لاہور( این این آئی) پاکستان مسلم لیگ (ن) کے صدر و قائد حزب اختلاف محمد شہباز شریف لندن سے وطن واپس پہنچ گئے ،شہباز شریف نے عالمی ادارہ صحت کے کے اصولوں کے مطابق خود کو کچھ روز کے لئے اپنے گھر ماڈل ٹائون میں قرنطینہ میں رکھنے کا فیصلہ کیا ہے ۔

مسلم لیگ (ن) کے صدر محمد شہباز شریف اتوار کی صبح پی آئی اے کی پرواز پی کے 786کے ذریعے لندن سے اسلام آباد پہنچے اور کچھ دیر قیام کے بعد بذریعہ موٹر وے لاہور اپنی رہائش گاہ ماڈل ٹائون پہنچ گئے۔ لندن سے اسلام آباد پہنچنے پر سابق وزیراعظم شاہد خاقان عباسی، مریم اورنگزیب اور عطا تارڑ نے ان کا استقبال کیا۔ وطن واپسی پر شہباز شریف نے ماسک پہنا ہوا تھا، انہوں نے کسی سے ہاتھ نہیں ملایا بلکہ دور سے ہی السلام علیکم کہتے رہے۔ شہباز شریف اسلام آباد میں کچھ دیر قیام کے بعد بذریعہ موٹر وے لاہور پہنچ گئے۔ پارٹی ذرائع کے مطابق شہباز شریف نے عالمی ادارہ صحت کے اصولوں کے مطابق خود کو کچھ دنوں کے لئے اپنے گھر ماڈل ٹائون میں قرنطینہ میں رکھنے کا فیصلہ کیا ہے جس کا مقصد عوام کو یہ پیغام دیناہے کہ ہر شخص جو بیرون ملک سے آئے وہ رضاکارانہ طور پر خود کو الگ رکھے اور اس خطرناک مرض کو شکست دی جا سکے ۔شہباز شریف 4 ماہ 3 دن کے بعد بیرون ملک سے وطن واپس پہنچے ہیں ۔شہباز شریف 19 نومبر 2019 کو اپنے بڑے بھائی نواز شریف کے ہمراہ علاج کے لئے لندن روانہ ہوئے تھے ۔

موضوعات:شہباز شریف