اسلام آباد (مانیٹرنگ ڈیسک) آئی ایس آئی سی ٹی سی ڈیرہ اسماعیل خان کے کمانڈنگ آفیسر کرنل مجیب الرحمن گزشتہ روز ٹانک کے قریب دہشت گردوں کے خلاف آپریشن میں شہید ہوئے۔ پاکستان آرمی کے اس بہادر آفیسر نے شہادت سے قبل دو انتہائی سفاک دہشت گردوں کو واصل جہنم کیا جو کہ ڈیرہ میں دہشت گردی کی ایک بہت بڑی کارروائی کرنے جارہے تھے۔

روزنامہ جنگ کے مطابق استور کے قریب علاقے بنجی سے تعلق رکھنے والے کرنل مجیب الرحمٰن نے PMA 91 لانگ کورس میں کمیشن حاصل کیا۔ اطلاعات کے مطابق جس وقت کرنل مجیب کو زخمی حالت میں سی ایم ایچ پنڈی منتقل کیا گیا ان کے بارہ سالہ بیٹے نے باپ سے لپٹ کر شکایت کی کہ یہ چیٹنگ ہے کیونکہ آپ نے کہا تھا کہ ہم دشمنوں کے ساتھ مقابلہ کرینگے اس منظر کو دیکھ کر وہاں موجود دیگر لوگ اپنے جذبات پر قابو نہ پاسکے اور دھاڑیں مار کر رونے لگے۔ بعد ازاں جب کرنل کے جسد خاکی کو تدفین کیلئے لے جایا جارہا تھا تو شہید کرنل کے بارہ سالہ بیٹے نے انتہائی معصومیت سے کمانڈنگ آفیسر کو درخواست کی کہ انکل میرے دوسرے بہن بھائیوں کو نہیں بتائیے گا کہ بابا کو کیا ہوا ہے۔ شہید کرنل مجیب الرحمن کے تین بیٹے اور ایک بیٹی ہے۔ سب سے بڑے بیٹے کی عمر 12 سال کے قریب ہے۔