اسلام آباد (این این آئی)وزیراعظم عمران خان کی خصوصی کوششوں سے بیرون ملک قید 8608 پاکستانیوں کو قید سے آزادی کا پروانہ مل گیا اور اس حوالے سے وفاقی حکومت نے تمام اعداد وشمار کی رپورٹ جاری کر دی ۔

وزیراعظم عمران خان نے وزارت عظمی کا منصب سنبھالنے کے بعد پہلی تقریر میں جیلوں میں قید پاکستانیوں اور انکی مشکلات کا ذکر کیا تھا ،وزیراعظم نے منصب سنبھالتے وقت بیرونی جیلوں میں اسیر ہم وطنوں کی رہائی کیلئے بھرپور کوشش کا عزم کیا تھا ،سعودی ولی عہد محمد بن سلمان پاکستان تشریف لائے تو وزیراعظم نے ان سے پاکستانی قیدیوں کی رہائی کی درخواست کی ،وزیراعظم نے نہایت جذباتی انداز میں ان محنت کش پاکستانیوں کا ذکر کرتے ہوئے کہا کہ میرے پاکستانیوں کا خیال رکھئے گا وہ میرے دل کے بڑے قریب ہیں ،سعودی عرب کی جیلوں سے 2620 پاکستانی موجودہ حکومت کی کوششوں سے رہا ہوچکے ،یو اے ای کے جیلوں سے 3423 پاکستانی رہا ہو کر پاکستان آئے ،ملائشیا کے جیلوں میں قید پاکستانیوں کو گھر واپس لانے کیلئے وزیراعظم عمران خان نے دو دفعہ خصوصی طیارہ بھیجا،ملائشیا کے جیلوں میں قید 1540 پاکستانی رہا ہوکر خصوصی طیارے کے ذریعے وطن واپس پہنچے ،عراق سے 668، قطر سے 106 اور کویت کے جیلوں سے 113 پاکستانی قید سے آزاد ہوئے۔