اسلام آباد، ننکانہ صاحب (این این آئی)وزیراعظم عمران خان نے کہا ہے کہ ننکانہ صاحب میں قابل مذمت واقعہ بھارت میں مسلمانوں سمیت اقلیتوں پرحملوں سے مختلف ہے۔سماجی رابطے کی ویب سائٹ پر ٹوئٹ کرتے ہوئے وزیراعظم عمران خان نے ننکانہ صاحب میں ہونے والے واقعے پر مذمت کرتے ہوئے کہا کہ سانحہ ننکانہ صاحب اور بھارت میں اقلیتوں کے ساتھ جاری سلوک میں بہت فرق ہے، مودی آرایس ایس نظریے کے تحت اقلیتوں پرظلم وستم کی
حمایت کرتا ہے اور مسلمانوں کو ہدف بنا کر حملے کرنا آر ایس ایس کے ایجنڈے کا حصہ ہے۔وزیراعظم عمران خان نے کہا کہ ننکانہ صاحب واقعہ کوحکومت، پولیس اورعدلیہ کی جانب سے برداشت نہیں کیا جائے گا جبکہ ننکانہ واقعہ میرے ویژن سے متصادم ہے۔دریں اثنا وزیرداخلہ اعجاز شاہ نے کہا ہے کہ ننکانہ صاحب واقعہ کا مقدمہ درج ہو چکا ہے ، تمام کر داروں کو کیفر کر دار تک پہنچائینگے ۔وزیر اعظم اور ہماری ہمدردیاں سکھ کمیونٹی کے ساتھ ہیں۔
