اسلام آباد (این این آئی) وزیراعظم عمران خان نے کہا ہے کہ احتساب کا عمل جاری رہے گا کوئی سمجھوتہ نہیں کروں گا،کسی قسم کی بلیک میلنگ برداشت نہیں کریں گے،احتساب کی راہ میں روڑے اٹکانے والوں کو مایوسی ہو گی،ملک کی معاشی صورت حال میں بہتری کیلئے دن رات کام جاری ہے،کشمیری عوام کے حقوق کے لئے سیاسی اور سفارتکاری کوششیں جاری رہیں گی۔جمعرات کو سینئر رہنماء پاکستان تحریک انصاف نے وزیراعظم عمران خان سے ملاقات کی۔

ملاقات میں موجودہ ملکی سیاسی صورتحال اور قانونی امور پر تبادلہ خیال کیا گیا۔ ملاقات میں احتساب کے جاری عمل اور حکومت کے اصلاحاتی ایجنڈے پر بھی غور کیا گیا۔ وزیراعظم نے کہا کہ احتساب کا عمل جاری رہے گا کوئی سمجھوتہ نہیں کروں گا۔ انہوں نے کہا کہ کسی قسم کی بلیک میلنگ برداشت نہیں کریں گے۔ وزیراعظم نے کہا کہ احتساب کی راہ میں روڑے اٹکانے والوں کو مایوسی ہو گی۔ انہوں نے کہا کہ ملک کی معاشی صورت حال میں بہتری کے لئے دن رات کام جاری ہے۔وزیراعظم نے کشمیر میں جاری مسلسل لاک ڈاؤن پر اظہار تشویش کرتے ہوئے کہا کہ کشمیری عوام کے حقوق کے لئے سیاسی اور سفارتکاری کوششیں جاری رہیں گی۔ اس موقع پر گفتگو کرتے ہوئے ڈاکٹر بابر اعوان نے کہاکہ معاشی حالات کی بہتری کے لئے درست سمت کا تعین ہو چکا ہے،ملک کو پہلی بار ترقی کی راہ پر گامزن کیا جا رہا ہے۔ انہوں نے کہا کہ ماضی میں حکمرانوں نے ملکی ترقی کے لئے سنجیدگی کا مظاہرہ کبھی نہیں کیا۔انہوں نے کہا کہ 50 سال سے مسلط مافیا کے خلاف وزیراعظم نے تاریخی جدوجہد کی۔انہوں نے کہا کہ احتساب اور شفافیت موجودہ حکومت کی اہم کامیابی ہے۔انہوں نے کہا کہ غریب کا تحفظ اور عزت نفس کی خیال حکومتی ترجیح ہے۔انہوں نے کہا کہ ریاست مدینہ کا ماڈل اپنانا بہترین طرز حکمرانی ہے۔