اسلام آباد (مانیٹرنگ ڈیسک) پاکستان مسلم لیگ (ن) کے رہنما رانا ثناء اللہ کے بارے میں معروف صحافی جاوید چودھری نے ایک نجی ٹی وی پروگرام میں کہا کہ رانا ثناء اللہ آخری بار 13 مئی کو ہمارے پروگرام میں آئے تھے، معروف صحافی جاوید چودھری نے کہا کہ پروگرام کے بعد جب رانا ثناء اللہ رخصت ہو رہے تھے اس وقت انہوں نے مجھ سے کہا کہ یہ شاید آپ کے ساتھ میرا آخری پروگرام ہو، اس موقع پر جاویدچودھری نے اس کی وجہ پوچھی تو رانا ثناء نے جواب دیا کہ میرے خلاف کوئی ثبوت نہیں مل رہا، مجھے خطرہ ہے میں اگر گرفتار نہ ہوا تو مجھے مروا

دیا جائے گا، اس موقع پر معروف صحافی نے کہا کہ رانا ثناء اللہ کو صرف شک نہیں تھا بلکہ یقین تھا چنانچہ اسی لیے انہوں نے اپنے گارڈز بھی تبدیل کر لیے تھے اور سکیورٹی بھی بڑھا دی تھی اور اس تبدیلی سے ان کے اردگرد موجود تمام لوگ واقف تھے، لہذا کوئی شخص اینٹی نارکوٹکس فورس کے موقف سے اتفاق نہیں کرے گا۔ معروف صحافی نے کہا کہ یہ کیس بھی فیوچر میں نواز شریف کے ہائی جیکنگ کیس اور چودھری ظہور الٰہی کے خلاف بھینس چوری کا مقدمہ ثابت ہوگا‘ یہ گرفتاری ریاست اور حکومت دونوں کو اخلاقی لحاظ سے کمزور کردے گی۔