اسلام آباد (این این آئی)وزیراعظم نے اراکین پارلیمنٹ کے پروڈکشن آرڈر سے متعلق قوانین میں ترمیم کی ہدایت کر تے ہوئے کہاہے کہ منی لانڈرنگ اور کرپشن میں ملوث ارکان کے پروڈکشن آرڈر جاری نہیں ہونے چاہئیں۔ منگل کو یہاں وفاقی کابینہ کے اجلاس کے دوران اظہار خیال کرتے ہوئے وزیر اعظم عمران خان نے کہاکہ منی لانڈرنگ اور کرپشن والے قیدیوں کو جیل میں سیاسی قیدی کا درجہ نہیں ملنا چاہیے۔ ذرائع کے مطابق معاملہ وزارت قانون
کے سپرد کر دیا گیا، کابینہ نے حج پالیسی 2019 کی منظوری دیدی، حج پالیسی 2019 کے تحت حجاج کے کوٹے میں اضافے کی منظوری دے دی گئی۔ ذرائع نے بتایاکہ وزیراعظم نے وفاقی کابینہ کو اپنے دورہ امریکہ کے حوالے سے اعتماد میں لیا۔ وزیراعظم نے کہاکہ امریکہ جا کر پاکستان کی بات کروں گا، واشنگٹن میں پاکستانی سفارتخانے میں قیام کروں گا۔وزیراعظم عمران خان نے کہاکہ وزیر خارجہ شاہ محمود قریشی بھی امریکہ جانیوالے وفد میں شامل ہوں گے۔
