اسلام آباد(مانیٹرنگ ڈیسک ) وزیراعظم ایم کیو ایم کو ایک اور وزارت دینے پر رضامند، میڈیا رپورٹس کے مطابق وزیراعظم سے گورنر سندھ اور وفاقی وزیر قانون فروغ نسیم نے ملاقات کی جس میں ایم کیو ایم کو ایک اور وزارت دینے پر اتفاق کیا گیا۔وزیر اعظم نے ملاقات کے دوران جمہوری عمل میں ایم کیو ایم کے مثبت کردار کو سراہا اور کہا کہ کراچی ملک کی ترقی میں اہم کردار ادا کرتا ہے اسے نظر انداز نہیں کیا جا سکتا۔عمران خان کا کہنا تھا کہ کراچی اور حیدرآباد کے میئرز کو مالی پیکیج بھی دیا جائے گا اور دونوں
میئرز کو بااختیار بنانے کی ضرورت پر بھی زور دیا گیا۔وزیر اعظم آفس کی جانب سے جاری اعلامیے کے مطابق عمران خان نے وفاقی وزیر قانون اور گورنر سندھ پر مشتمل کمیٹی کو ٹاسک دیدیا ہے، کمیٹی دو روز میں وزیر اعظم کو سفارشات پیش کرے گی۔یا درہے کہ حکومت کو بجٹ پاس کرانے میں سخت مشکلات کاسامنا ہے ، حالیہ فیصلہ بھی اسی تناظر میں لگتا ہے تاکہ حمایت حاصل کی جاسکے۔