اسلام آباد(آئی این پی ) وزیراعظم عمران خان نے کہا ہے کہ قومی اسمبلی کے اجلاس سے اپوزیشن کا واک آئوٹ حکومت پر دباؤ ڈال کر این آر او لینے کے حربے ہیں ، اس طرح کرپشن کے خلاف احتساب کو نہیں روکا جاسکتا۔ منگل کو سماجی رابطے کی ویب سائٹ ٹوئٹر پر اپنے ایک بیان میں وزیراعظم نے کہا کہ ہر سال پارلیمنٹ پر عوام کے ٹیکس کے کروڑوں
روپے خرچ ہوتے ہیں اور اپوزیشن کی جانب سے اجلاس سے ایک اور واک آؤٹ سے ظاہر ہوتا ہے کہ اپوزیشن صرف یہی کر سکتی ہے۔وزیراعظم عمران خان نے کہا کہ اس طرح کے اقدامات حکومت پر دبا ؤڈالنے اور این آر او لینے کے لیے ہیں، اس طرح کرپشن کے خلاف احتساب کو نہیں روکا جاسکتا۔وزیراعظم نے کہا کہ نیب کے مقدمات تحریک انصاف کے بنائے ہوئے نہیں ہیں۔
