اسلام آباد(مانیٹرنگ ڈیسک) برطانوی نشریاتی ادارے نے حیران کن دعویٰ کیا ہے کہ آج نوازشریف کے قافلے میں اچانک تیزی کا سبب خواجہ سعد رفیق کو ملنے والا ایک خفیہ پیغام تھا۔ تفصیلات کے مطابق برطانوی نشریاتی ادارے بی بی سی نے دعویٰ کیا ہے کہ نواز شریف

کے ساتھ تعینات پولیس سکواڈ کے ایک سکیورٹی اہلکار نے نام نہ بتانے کی شرط پر بتایا کہ وفاقی وزیر خواجہ سعد رفیق جب کچہری چوک راولپنڈی پہنچے تو اچانک چند افراد ان سے ملنے کے لیے آ گئے وہ کچھ دیر ان سے بات کرتے رہے اور پھر انھیں اپنے ساتھ لے کر چلے گئے۔کچھ دیر بعد خواجہ سعد رفیق واپس آ گئے، وہ جا کر سابق وزیرِ اعظم نواز شریف کی گاڑی میں بیٹھے اور نواز شریف سے بات چیت کرتے رہے، اس کے فوراً بعد نواز شریف کے قافلے کی سپیڈ بہت زیادہ بڑھ گئی اور قافلہ اس قدر تیز رفتاری سے گزرتا گیا کہ راستے میں منتظر استقبالی پارٹیاں دیکھتی رہ گئیں۔ اور نواز شریف کسی جگہ نہ رکے، قافلہ 120 کی سپیڈ سے جہلم جا کر رکا، پولیس اہلکار نے دعویٰ کیا کہ جو لوگ خواجہ سعد رفیق کو لے کر گئے انہوں نے سعد رفیق کی وساطت سے نواز شریف کو کوئی پیغام دیا۔ جس کے بعد نواز شریف نے پلان تبدیل کیا اور کسی بھی جگہ رکے بغیر سیدھے جہلم چلے گئے۔ واضح رہے کہ ابھی تک مسلم لیگ (ن) نے واضح نہیں کیا کہ اچانک پلان کیوں تبدیل کیا گیا۔