نئی دہلی (آئی این پی) بھارت پاکستان اور لائن آف کنٹرول کے دونوں جانب برہان مظفر وانی کی پہلی برسی بھرپور انداز میں منائے جانے پر سیخ پا ہوگیا اور ہرزہ سرائی کرتے ہوئے کہا ہے کہ پاکستان کی جانب سے دہشتگردی کی حمایت اور سپانسرشپ کی مذمت کرنے کی ضرورت ہے ۔اتوار کو بھارتی میڈیا کے مطابق پاکستان کی جانب سے برہان وانی کی پہلی برسی کو بھرپور انداز میں منائے جانے پر ردعمل ظاہر کرتے ہوئے
وزارت خارجہ کے ترجمان گوپال بگلے نے سوشل میڈیا ویب سائٹ ٹویٹر پر اپنے بیان میں کہاکہ پاکستان کی جانب سے دہشتگردی کی حمایت اور سپانسرشپ کی مذمت کرنے کی ضرورت ہے ۔واضح رہے کہ گزشتہ روز برہان مظفر وانی شہید کی پہلی برسی کو پاکستان اور کنٹرول لائن کے دونوں اطراف بھرپور انداز میں منایا گیا۔پوری دنیا میں موجود کشمیریوں نے برہان وانی کو خراج عقیدت پیش کیا۔مقبوضہ کشمیر میں حریت رہنماں کی اپیل پر بھرپور احتجاج کیا گیا جبکہ ریلیوں کو روکنے کے لیے بھارتی فورسز نے کارروائیاں کیں اور مظاہرین پر لاٹھی چارج کیا اور آنسو گیس کا استعمال کیا۔پوری وادی میں مارکیٹیں اور دکانیں اور تجارتی مراکز سمیت تمام اہم مقامات بند رہے۔بھارتی فوج نے سید علی گیلانی، میرواعظ، یاسین ملک سمیت کشمیری رہنماں کو نظر بند اور گرفتار کرکے احتجاجی مظاہروں کی قیادت کرنے سے روکا۔حزب المجاہدین کے سپریم کمانڈر صلاح الدین نے آزاد کشمیر کے دارالحکومت مظفر آباد میں ریلی کی قیادت کی اور برہان وانی کو خراج عقیدت پیش کیا۔
