راولپنڈی( آن لائن ) آرمی چیف جنرل قمرجاوید باجوہ پارہ چنار پہنچ گئے ہیں جہاں انہوں نے قبائلی عمائدین سے ملاقات کی ،پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ پارہ چنار پہنچ گئے، آرمی چیف پارہ چنارمیں دھرنا دیئے بیٹھے قبائلی عمائدین سے ملاقات کی ۔ آئی ایس پی آر کے مطابق جنرل باجوہ کو سکیورٹی کی صورتحال پر بریفنگ بھی دی گئی انہوں نے دو روز قبل

پارہ چنار کا دورہ کرنا تھا تاہم خراب موسم کے باعث وہ روانہ نہیں ہو سکے تھے۔ آرمی چیف نے سانحہ پارہ چنار میں جاں بحق افراد کے لواحقین اور عمائدین سے ملاقاتیں بھی کیں اس سے قبل آرمی چیف جنرل قمر جاوید باجوہ نے پارا چناردھماکوں کی مذمت کرتے ہوئے کہا تھا کہ دشمن اپنی بزدلانہ کارروائیوں سے قوم کی خوشیوں کو خراب کرنے کی کوشش کر رہا ہے تاہم دشمن ایسا کرنے میں ناکام ہوگا۔واضح رہے کہ گزشتہ ہفتے پارہ چنارکے مرکزی بازارمیں یکے بعد دیگرے 2 دھماکوں میں 67 افراد جاں بحق ہوئے تھے۔