اسلام آباد(مانیٹرنگ ڈیسک)وزیراعظم نوازشریف ، ان کے بیٹوں ،بھائی اور داماد کے بعد پاناما جے آئی ٹی نے وزیراعظم کی صاحبزادی مریم نواز کو بھی طلب کرلیا۔ایف آئی اے کے ایڈیشنل ڈائریکٹر جنرل واجد ضیاء کی سربراہی میں پاناما تحقیقات کے لیے بننے والی جے آئی ٹی نے وزیراعظم نوازشریف کی صاحبزادی مریم نواز کو پانچ جولائی کو صبح گیارہ بجے متعلقہ دستاویزات کے ساتھ بلایا گیا ہے۔جے آئی ٹی نے وزیراعظم نوازشریف کے صاحبزادوں حسین اور حسن نواز کو بھی پھر طلب کیا ہے، حسن نواز کو 3 جولائی اور حسین نواز کو4 جولائی کو صبح گیارہ بجے فیڈرل جوڈیشل اکیڈمی طلب کیا گیا ہے۔حسین نواز اس سے پہلے پانچ مرتبہ جبکہ حسن نواز دو بار جوڈیشل اکیڈمی میں جے آئی ٹی کے روبرو پیش ہوچکے ہیں۔عید کی ایک دن کی چھٹی کے بعد پاناما پیپرز معاملے پرمشترکہ تحقیقاتی ٹیم کا اجلاس آج وڈیشل اکیڈمی میں ہورہا ہے، اجلاس میں جے آئی ٹی ارکان قلم بند کرائے گئے بیانات کا جائزہ لیا جارہا ہے۔مشترکہ تحقیقاتی ٹیم نے 10 جولائی کو اپنی رپورٹ سپریم کورٹ میں پیش کرنی ہے، سپریم کورٹ کی جانب سے دی گئی ڈیڈ لائن کے مطابق کام مکمل کرنے کے لیے جے آئی ٹی نے ہفتہ وار چھٹیاں بھی نہیں کی ہیں۔دوسری جانب جے آئی ٹی نے وزیراعظم نوازشریف کے کزن طارق شفیع کو 2جولائی بروز اتوار دن 12بجے دوسری بار طلب کرلیا ہے۔ذرائع کے مطابق طارق شفیع کی دوبارہ پیشی کے لئے جاری سمن23جون کو عرفان منگی کے دستخط سے جاری کیا گیا۔