اسلام آباد(مانیٹرنگ ڈیسک)نجی ٹی وی پروگرام میں گفتگو کرتے ہوئے سینئر صحافی رؤف کلاسرا کا کہنا تھا کہ اگر سینئر جنرلز میں تعلقات اچھے ہوں تو جس دن آرمی چیف کی تعیناتی کا اعلان ہوتا ہے وہ اسی دن اپنے سینئرز کو فون کرکے انہیں استعفیٰ نہ دینے کا کہتا ہے اور ایسی مثالیں موجود ہیں کہ سپر سیڈ ہونے والے جنرلز مستعفی نہیں ہوئے۔
انہوں نے کہا کہ نئے آرمی چیف جنرل قمر جاوید باجوہ اور جنرل جاوید رمدے قریبی دوست ہیں۔ ایک نجی محفل میں جنرل باجوہ نے جنرل رمدے کو کہا تھا کہ اگر میں آرمی چیف بن گیا تو آپ کو جانے نہیں دوں گا اور اگر آپ بن گئے تو میں چلا جاؤں گا۔اورجنرل قمر جاوید باجوہ نے اپنے آرمی چیف بنتے ہی اس وعدے کو پورا کر دیا ہے۔
قابل ازیں لیفٹنٹ جنرل اشفاق ندیم اور لیفٹنٹ جنرل جاوید اقبال رمدینے اپنی ریٹائرمنٹ تک ملازمت پر موجود رہنے کا فیصلہ کیا ہے۔ گزشتہ روز کمان کی تبدیلی کے موقع پر ایک سوال کے جواب میں دونوں جرنیلوں کا کہنا تھا کہ وہ اپنی ریٹائرمنٹ تک ملازمت پر موجود رہیں گے اور ذمہ داریاں سر انجام دیتے رہیں گے۔ اس موقع پر جنرل اشفاق ندیم کا کہنا تھا کہ تمام فیصلوں کا اختیار آرمی چیف جنرل قمر باجوہ کے پاس ہے۔
واضح رہے کہ فوج میں یہ روایت چلتی آ رہی ہے کہ جونیئر آفیسر آرمی چیف تعینات ہو تو سینئر افسران اپنے عہدے سے ریٹائرڈ ہو جاتے ہیں لیکن لیفٹنٹ جنرل اشفاق ندیم اور لیفٹنٹ جنرل جاوید اقبال رمدے نے ریٹائرمنٹ نہ لینے کا اعلان کرتے ہوئے مذکورہ روایت کو توڑ دیا ہے ۔
ماضی میں بھی جنرل راحیل شریف کو آرمی چیف کے عہدے پر تعینات کیا گیا تھا تو ان کے سینئر جرنیلوں نے اپنے عہدے سے استعفے دیدیئے تھے۔