اسلام آباد(مانیٹرنگ ڈیسک)ترجمان دفترخارجہ نفیس زکریا نے کہاہے کہ اقوام متحدہ کی جنرل اسمبلی کی 193 رکنی کمیٹی معاشرتی، انسانی اور ثقافتی معاملات پر کام کرتی ہے۔ کمیٹی میں پیش کی گئی قرارداد میں کہا گیا ہے کہ کشمیری عوام کو حق خود ارادیت ملنا ان کا حق ہے۔ بہتر ممالک نے قرار داد کی حمایت کی ہے۔ انکا کہنا تھا کہ پاکستان یہ قرارداد انیس سو اکیاسی سے پیش کر رہا ہے۔انہوں نے کہاکہ توقع ہے کہ آئندہ ماہ اقوام متحدہ کی جنرل اسمبلی بھی اس قرارداد کی حمایت کر دے گی۔
قرارداد کے متن میں 193رکنی باڈی کی جانب سے کسی بھی فوجی مداخلت اورقبضہ کی بھرپور مخالفت کا اعادہ کیا گیا ہے۔ فوجی مداخلت سے دنیا کے مختلف خطوں میں انسانی حقوق اور عوام کے حق خودارادیت کو دبایا جاتا ہے۔نفیس زکریانے کہاکہ قرارداد میں فوجی مداخلت اور علاقوں پر قبضہ اور وہاں کے باشندوں سے امتیازی سلوک اور تشدد روکنے کے لیے دباو ڈالا گیا ہے۔اقوام متحدہ میں پاکستان کی مستقل مندوب ملیحہ لودھی نے کہاہے کہ کشمیریوں کی آزادی کیلئے آواز بلند کرنے کے جذبے کو زندہ رکھا۔ دنیا کے
لاکھوں افراد نے مقبوضہ کشمیر میں غیرملکی تسلط سے آزادی کیلئے کوشش کی۔ انکا کہنا تھا کہ جدوجہد آزادی کی بدولت دنیا میں کئی قوموں کو غیرملکی قبضے سے نجات ملی اور نئی ریاستیں وجود میں آئیں۔انہوں نے کہاکہ اب کشمیرکامسئلہ اہمیت اختیارکرچکاہے اوربھارت کومقبوضہ کشمیرکے عوام کوحق خود ارادیت دیناپڑے گا۔
