اسلام آباد(مانیٹرنگ ڈیسک) ماضی میں ایک دوسرے سے شدید سیاسی مخالفت رکھنے والے آج سیاسی حریف بن بیٹھے، پانامہ لیکس سمیت دیگر دوسرے اہم کیسز میں عمران خان کو مشورے دینے والے پاکستان پیپلز پارٹی کے مرکزی رہنماء و سینئر قانون دان بابر اعوان اور عمران خان کی ماضی کی ایک ایسی وڈیو سوشل میڈیا پر وائرل ہو چکی ہے کہ دونوں دیکھتے ہی شرمسار ہو جائیں گے۔ تفصیل کے مطابق صدر زرداری کے دور میں نجی ٹی وی چینل کے پروگرام ’’کیپیٹل ٹاک‘‘ میں عمران خان اور بابر اعوان نے ایک دوسرے پر الزامات کی شدید بوچھاڑ کر دی۔ پروگرام میں عمران خان نے اپنے موجودہ دوست بابر اعوان کو سچ بولنے کیلئے ہمت کرنے کی دعا دیتے ہوئے کہا تھا کہ وہ وزارت حاصل کرنے کیلئے اس وقت کے صدر آصف علی زرداری کا ساتھ دے رہے ہیں۔ پروگرام میں بابر اعوان اور عمران خان کے مابین شدید تلخ جملوں کا تبادلہ بھی ہوا تھا۔ عمران خان نے کہا تھاکہ خدا کیلئے اپنی ذات اور جھوٹی وزارتوں کیلئے پاکستان کا بیڑہ غرق نہ کریں جس پر بابر اعوان نے کہا کہ میں وزیر نہیں ہوں۔عمران خان نے بابر اعوان کو مخاطب کرتے ہوئے کہا کہ ایک آدمی جس نے ملک کو لوٹا ہوا ہے اس کو بچانے کیلئے پیچھے کھڑے ہوئے ہیں تو بابر اعوان نے جواب دیا کہ سوال ہی پیدا نہیں ہوتا، عدالتی احکامات کے بعد یہ کہنا بھی توہین عدالت ہے جس پر عمران خان نے کہا کہ میں تیار ہوں توہین عدالت کیلئے۔واضح رہے کہ ماضی میں ایک دوسرے پر کیچڑ اچھالنے والے آ جکل گہرے دوست بنے ہوئے ہیں اور امکان ظاہر کیا جا رہا ہے کہ عمران خان پانامہ لیکس کیس میں بابر اعوان کو ہی وکیل مقرر کریں گے۔

موضوعات:بابر اعوان عمران خان