بھمبر(آن لائن)بے لگام بھارتی سکیورٹی فورسز کی پھر سول آبادی پر گولہ باری ،پاک فوج کی جوابی کارروائی سے دشمن کی صفوں میں سکتہ طاری ہو گیا ۔ سکیورٹی ذرائع کے مطابق بھارتی فوج کی جانب سے ایل او سی پر بلا اشتعال فائرنگ کا سلسلہ رکنے کا نام نہیں لے رہا ہے اور بھارتی فورسز نے ایک بار پھر سیز فائر کی خلاف ورزی کرتے ہوئے لائن آف کنٹرول پر بلا اشتعال فائرنگ کی ہے۔بھارتی فوج کی جانب سے سماہنی سیکٹر میں ہفتہ کی صبح ساڑھے 9 بجے بلا اشتعال فائرنگ کی گئی جو وقفے وقفے سے جاری رہی۔ بھارتی فوج کی جانب سے سول آبادی کو نشانہ بنایا گیا ہے جبکہ پاک فوج کی جانب سے بھارتی گنوں کو خاموش کرانے کے لئے بھرپور جواب دیا۔ جس سے دشمن کی صفوں میں سکتہ طاری ہو گیا ۔دوسری جانب بھارت نے حقیقت تسلیم کر تے ہوئے اعتراف کیا ہے کہ کنٹرول لائن پر پاک فوج کی جوابی فائرنگ سے ہمارے 13فوجی ہلاک ہو گئے۔واضح رہے کہ گزشتہ روز بھارتی فوج کی جانب سے سمندری حدود میں داخل ہونے کی ناپاک کوشش کی جسے پاک بحریہ نے ناکام بناتے ہوئے بھارتی آبدوز کو واپس اپنے پانی کی جانب بھگا دیا۔ اس کے علاوہ بھارتی فورسز نے دو روز قبل ایل او سی پر بھمبر سیکٹر میں بھی بلا اشتعال فائرنگ کر کے 7 پاکستانی فوجیوں کو شہید کر دیا تھا جس کا پاک فوج کی جانب سے بھی بھرپور جواب دیا گیا تھا۔

موضوعات:ایل او سی سیزیز فائر