لاہور ( این این آئی) وفاقی وزیر خزانہ سینیٹر اسحاق ڈار نے کہا ہے کہ عمران خان کو لندن یاترا سے کچھ نہیں ملے گا ، بلاول کا ایک مطالبہ پورا کر دیا اور باقی تین اپنے وقت پر پورے ہوں گے ، پانامہ کا معاملہ عدالت میں ہے ،عمران خان کو نہ دھرنے میں کامیابی ملی اور نہ اب ملے گی ، حق اور سچ کی فتح ہو گی ،ملک مشکلات سے گزر رہا ہے جسے آگے لیجانے کے لئے ہمیں سیاسی یکجہتی کی ضرورت ہے اختلافات نہیں ہونے چاہئیں ،ملکی سیاست کہیں نہیں جا رہی ، تمام ادارے اپنا کام کرر ہے ہیں حکومت اپنی مدت پوری کرے گی اور 2018ء کا سال 2013ء سے بہتر ہو گا ۔

ان خیالات کا اظہار انہوں نے گزشتہ روز پیپلز پارٹی کے سینئر رہنما و سابق وفاقی وزیر جہانگیر بدر کے انتقال پر انکی رہائشگاہ علی ٹاؤن آمد کے موقع پر لواحقین سے اظہار تعزیت اور فاتحہ خوانی کے بعد میڈیا سے گفتگو کرتے ہوئے کیا ۔ اسحاق ڈار نے کہا کہ جہانگیر بدر مرحوم سے 50سالہ رفاقت تھی اور ان سے میری بہت گہری دوستی تھی ۔ حصول تعلیم کے دوران ہمارے راستے جدا ہوئے ۔جہانگیر بدر نے دوستی بھی نبھائی اور پارٹی کے ساتھ مخلص بھی رہے ۔انہوں نے کبھی بھی کسی حوالے سے اپنی پارٹی پر کوئی کمپرومائیز نہیں کیا اس حوالے سے وہ بہت قابل قدر انسان تھے ان کے جانے سے ایک بہت بڑا خلا پیدا ہوگیا ہے اور تمام سیاسی جماعتیں ایک اچھے دوست سے محروم ہوگئی ہیں ۔ انہوں نے کہا کہ مرحوم جہانگیر بدر نے سیاست میں ہمیشہ تحمل ، برداشت اور رواداری کا فروغ دیا ، سیاست میں ہمارے راستے جدا تھے لیکن دوستی رہی ۔ انکی کی پیپلز پارٹی کے لئے قابل قدر خدمات تھیں اور انکے بیٹے کا نام بھی نصرت بھٹو نے رکھا تھا ،اللہ مرحوم کے گنا ہ معاف فرمائے ۔ ایک سوال کے جواب میں انہوں نے کہا کہ ملکی سیاست کہی نہیں جارہی

انشاء اللہ مسلم لیگ (ن) کی حکومت اپنی مدت پوری کرے گی ۔ہمیں چارٹر آف اکانومی پر ضرور دینا چاہیے ۔ انہوں نے کہا کہ تمام ادارے اپنا کام کررہے ہیں اور انشاء اللہ پاکستان ترقی کی جانب جانا شروع ہوگیا اور آپ دیکھیں گے کہ 2018میں وہ پاکستان نہیں ہوگا 2013میں تھا ۔انہوں نے پانامہ کیس میں پی ٹی آئی کے وکیل حامد خان کے حوالے سے کئے گئے سوال کے جواب میں کہاکہ ہمار امسئلہ نہیں یہ پی ٹی آئی کا مسئلہ ہے اور اس حوالے سے وہ ہی بہتر بتا سکتے ہیں ۔ انہوں نے کہاکہ ملک مشکلات سے گزر رہا ہے ہمیں اس کو آگے لے کر جانا چاہیے اور اس کے لئے سیاسی یکجہتی کی ضرورت ہے اختلافات نہیں ہونے چاہئیں ۔ عمران خان کی لندن روانگی کے حوالے سے سوال کے جواب میں انہوں نے کہا کہ ہمیں کسی پر شک نہیں کرنا چاہیے ، ہو سکتا ہے کہ عمران خان لندن میں اپنے بچوں سے ملنے گئے ہوں ۔ لیکن عمران خان کو لندن یاترا سے بھی کچھ حاصل نہیں ہو گا ۔پانامہ لیکس کے حوالے سے سوال کے جواب میں اسحاق ڈار نے کہا کہ پامانہ کا معاملہ عدلت میں ہے اور حق اور سچ کی فتح ہو گی ۔ کیس کے لئے ہمارے وکلاء تبدیل نہیں ہوئے بلکہ وہی ہیں اور حامد خان پی ٹی آئی کے وکیل ہیں اور ان کو ہٹانے کے حوالے سے پی ٹی آئی ہی بہتر جواب دے سکتی ہے ۔بلاول بھٹو کے حوالے سے بات کرتے ہوئے انہوں نے کہا کہ بلاول بھٹو جب بھی ملے انہیں بیٹا کہہ کر پکارا ۔ بلاول کے 4مطالبات میں سے ایک پورا کر دیا گیا ہے دیگر تین مطالبے اپنے وقت پر پورے ہوں گے ۔

موضوعات:اسحاق ڈار عمران خان