لاہور(این این آئی)سپیکر قومی اسمبلی سردارایازصاد ق نے کہاہے کہ ترک صدر آئندہ ہفتے پارلیمنٹ کے مشترکہ سیشن سے خطاب کرینگے ، پی ٹی آئی سمیت تمام جماعتوںکو اس موقع پر اسمبلی میں آناچاہیے ،عمران خان کو پانامہ لیکس کیس کے عدالتی فیصلے کا انتظار کرناچاہیے ، حکومت عوام کی زندگیوں میں بہتری لانے کیلئے مرحلہ وار آگے بڑھ رہی ہے اور اس میں کامیابی بھی ملی ہے ، تعلیم ،پینے کے صاف پانی کی فراہمی اور سیوریج کے نظام کی بہتری ترجیح ہے اور اس سلسلہ میں انقلابی اقدامات اٹھائے گئے ہیں۔ان خیالات کا اظہارانہوںنے سمن آبادمیں نجی سکول کے سپورٹس گالا کے افتتاح کے موقع پر میڈیا سے گفتگو کرتے ہوئے کیا ۔ سپیکر قومی اسمبلی سردار ایاز صادق نے کہا کہ حکومت کئی سالوں سے موجود مسائل کو مرحلہ وار حل کر رہی ہے اور مثبت بات یہ ہے کہ اس میں کامیابی بھی ملی ہے۔ پینے کے صاف پانی کی فراہمی اور سیوریج کے نظام میںبہتری ترجیح ہے ۔ اسی طرح تعلیم کے شعبے میںبھی آگے بڑھ رہے ہیں اور اس کیلئے انقلابی اقدامات اٹھائے گئے ہیں۔ انہوں نے پانامہ لیکس کے حوالے سے کہا کہ یہ معاملہ اب عدالت میںزیر سماعت ہے اسے اب زیر بحث نہیں لاناچاہیے ۔ عمران خان کوبھی پانامہ لیکس کیس کے عدالتی فیصلے کا انتظار کرناچاہیے ۔ انہوں نے بتایا کہ ترک صدر اپنے دورہ پاکستان کے دوران آئندہ ہفتے پارلیمنٹ کے مشترکہ سیشن سے بھی خطاب کریں گے۔پی ٹی آئی سمیت تمام جماعتوں کو اس موقع پر موجود ہوناچاہیے ۔ مجھے امیدہے کہ پی ٹی آئی کے دوست بھی آئیں گے۔ میںپیشکش کرتا ہوںکہ بیشک مجھے جناب سپیکر کی بجائے ایاز کہہ کر مخاطب کر لیںلیکن پارلیمنٹ میں ضرور آئیں ۔ انہوںنے عشرت العباد کے حوالے سے (ن) لیگ کے سینئر رہنما کے بیان بارے سوال کے جواب میں کہا کہ اس پر موقف آ چکا ہے ۔ عشرت العباد اب چلے گئے ہیںان کا پیچھا چھوڑ دینا چاہئے۔