اسلام آباد(رائٹرز/ العربیۃ/ واس) سعودی عرب میں مکہ مکرمہ کی جانب پہلی بار میزائل فائر کر دیا گیا۔ تفصیل کے مطابق یمن سے پہلی بار حوثی باغیوں نے مکہ مکرمہ کی طرف میزائل فائر کر دیا۔ اتحادی فورسز نے 65کلومیٹر دور سے یمن کی حدود میں ہی میزائل کو ناکارہ بنا دیا۔ سعودی خبر ایجنسی واس کی جاری کردہ رپورٹ کے مطابق مذکورہ حملہ یمن کے صوبے صعدہ سے کیا گیا تھا۔ جو سرزمین مقدس مکہ مکرمہ سے تقریباََ 800 کلومیٹر کے فاصلے پر ہے۔ رپورٹ کے مطابق سعودی فورسز نے میزائل کو مکہ مکرمہ پہنچنے سے پہلے ہی 65 کلومیٹر کے فاصلے پر مار گرایا۔ برطانوی خبر رساں ادارے ’’رائٹرز‘‘ کے مطابق حوثی باغیوں نے برکان 1 بیلسٹک میزائل کی تصدیق کر دی ہے کہ انہوں نے جدہ میں شاہ عبد العزیزایئر پورٹ کو نشانہ بنایا تھا جو کہ سعودی عرب کا مصروف ترین ایئر پورٹ شمار ہوتا ہے۔ دارلخلافہ صنعاء سمیت شمالی علاقے یمن میں باغیوں کے قبضے میں ہیں۔ واضح رہے کہ دو ہفتے قبل مکہ مکرمہ کے قریبی شہر طائف مین بھی حوثی باغیوں کی جانب سے میزائل فائر کیا گیا تھا تا ہم کوئی نقصان نہیں ہوا تھا۔