اسلام آباد(ایکسکلوژو رپورٹ) پاکستان تحریک انصاف کے دھرنے کو ناکام بنانے اور عمران خان کا ’’بندو بست‘‘ کرنے کیلئے صوبائی وزیر قانون رانا ثناء اللہ خان کی سربراہی میں خفیہ میٹنگ کی وڈیو لیک ہو گئی۔ تفصیل کے مطابق نجی ٹی وی رپورٹ میں انکشاف کیا گیا کہ رانا ثناء اللہ کی زیر صدارت خفیہ اجلاس میں تحریک انصاف اور عمران خان سے نمٹنے کی حکمت عملی تیار کی گئی ہے۔ خفیہ اجلاس میں رانا مقبول، چیف سیکرٹری ، ہوم سیکرٹری، آئی جی اور دیگر اعلیٰ حکام نے شرکت کی۔ نجی ٹی وی رپورٹ کے مطابق خفیہ اجلاس دوپہر ڈھائی بجے سے شام تک جاری رہا۔
نجی ٹی وی رپورٹ میں کہا گیا کہ رانا ثناء اللہ نے پولیس کی آئی بی اور سپیشل برانچ کو خصوصی ہدایات جاری کر دی ہیں۔ رپورٹ کے مطابق پاکستان تحریک انصاف کے رہنماؤں کی فہرست تین کیٹگریز میں مرتب کرنے کی ہدایات کی گئی ہیں۔ کیٹگری اے میں مرکزی قیادت اور ارکان اسمبلی شامل ہوں گے۔ نجی ٹی وی رپورٹ میں سینئر صحافی اسد کھرل کے مطابق رانا ثناء اللہ نے اپنی خفیہ میٹنگ میں متعلقہ اداروں کو ہدایات جاری کی ہیں کہ پنجاب کے کسی بھی شہر سے تحریک انصاف کے کارکنان کسی بھی صورت میں جڑواں شہروں میں نہیں پہنچنے چاہئیں۔ نجی ٹی وی رپورٹ کے مطابق تحریک انصاف کے دو نومبر کے دھرنے پر خوب دمادم مست قلندر ہونے کا امکان ہے اور حکومت نے بھی اس ضمن میں جارحانہ رویہ اپنایا ہوا ہے۔