اسلام آباد(مانیٹرنگ ڈیسک) نجی ٹی وی پروگرام میں سینئر تجزیہ نگار نے اہم انکشافات کر دیئے۔ سینئر تجزیہ نگار نے نجی ٹی وی پروگرام میں گفتگو کرتے ہوئے کہا کہ میری اطلاعات کے مطابق اقوام متحدہ میں پاکستان کی مستقل مندوب ملیحہ لودھی کی نوکری اس وقت بہت خطرے میں ہے۔ سینئر تجزیہ نگار مبشر لقمان نے کہا کہ میرے انتہائی باوثوق ذرائع کے مطابق PCB نجم سیٹھی کو اقوام متحدہ میں مستقل مندوب لگانے کا فیصلہ ہو گیا ہے۔ ڈاکٹر ملیحہ لودھی کو ہٹا کر نجم سیٹھی کو یہ عہدہ دیا جائے گا۔
مبشر لقمان نے کہا کہ میاں صاحب یہ کر سکتے ہیں اور کس حد تک کر سکتے ہیں ، یہ آنے والا وقت بتائے گا۔ اس وقت وزیر اعظم ہاؤس میں نہیں بلکہ ڈنگا گلی میں جو تمام کارروائیاں ہو رہی ہیں اس میں طیب اردوان ماڈل کی طرح کام کرنے کا سوچا جا رہا ہے جیسے طیب اردوان نے اپنے خلاف بولنے والے 80 ہزار لوگوں کو پابند سلاسل کر دیا ہے۔ طیب اردوان طرز کی جمہوریت کا اگلا ماڈل پاکستان میں لانے کی کوشش کی جا رہی ہے۔ اس کوشش کی پہلی شق یہ بنتی ہے کہ شائد نجم سیٹھی کو اقوام متحدہ میں پاکستان کا مستقل مندوب بنا دیا جائے اور ملیحہ لودھی کو ہمیشہ کیلئے فارغ کر دیا جائے، اگر ایسا ہوا تو یہ سب کیلئے حیران کن بات ہوگی۔