اسلام آباد (نیوزڈیسک)ٹیکس نظام میں بنیادی اصلاحات کیلئے پی ٹی آئی حکومت کی ہر طرح سے مدد کرنے کو تیار ہے ٗ اسد عمر کی پیشکش ،وفاقی وزیر خزانہ اسحاق ڈار نے کہا ہے کہ سیاسی اختلافات کی وجہ سے معیشت کو نقصان نہیں ہونا چاہئے ٗمیثاق جمہوریت کی طرح میثاق معیشت بھی کیا جائے ٗ مخالفین دعوؤں کے بجائے بیٹھ کر پلان بنائیں ٗملکر کام کریں گے تو معاشی شرح نمو 8فیصد تک چلی جائیگی ٗ 2018 تک 15 ہزار میگاواٹ بجلی سسٹم میں شامل کردی جائیگی ۔،نجی میڈیا گروپ کے زیر اہتمام پری بجٹ سیمینار سے خطاب کرتے ہوئے وفاقی وزیر خزانہ اسحاق ڈار نے کہا کہ معیشت پر سیاست نہیں ہونی چاہیے ملکی معیشت سے متعلق ملکر ٹھوس لائحہ عمل مرتب کرنا ہو گا ٗ انہوں نے کہا میثاق جمہوریت کی طرح میثاق معیشت بھی ہونا چاہیے۔ مخالفین دعوؤں کے بجائے بیٹھ کر پلان بنائیں کیونکہ مل کر کام کریں تو معاشی شرح نمو 8 فیصد تک چلی جائے گی۔ صوبوں کی ذمہ داری زیادہ ہے کہ وہ سرمایہ کاری کریں۔وزیر خزانہ نے کہا جن لوگوں کا دعویٰ تھا پاکستانی معیشت ترقی نہیں کر سکتی آج وہ خاموش ہو گئے ہیں ٗقرض معاف کرانے والوں کی بات کیوں نہ کریں تحقیقات ہوں گی اور ہر چیز کی ہوں گی انہوں نے کہاکہ کچھ لوگوں کو بڑے اداروں کے بورڈ میں لگا دیا جائے تو سب اچھا کا راگ الاپتے ہیں ٗبڑے فورمز پر آ کر جھوٹ بولنے والوں کو شرم آنی چاہیے ٗوزیراعظم اور وزرائے کے صوابدی فنڈز ختم کر دیئے ہیں۔ انہوں نے کہا اْس جماعت کا ذکر کیوں نہیں کیا جاتا جس کے دور میں قرض بڑھائے گئے۔وزیر خزانہ نے کہاکہ کسی پر تنقید کرنا آسان کام ہے تاہم کسی بھی شعبے میں اصلاحات کا عمل آسان نہیں ہوتا مشاورتی عمل پر یقین رکھتے ہیں اور بجٹ میں مثبت تجاویز شامل کریں گے ۔ 2013 میں معاشی بدحالی، دہشتگردی اور توانائی کے بڑے مسائل کا سامنا تھا ٗ عالمی اداروں نے پاکستان سے کاروبار بند کردیا تھا لیکن گزشتہ تین برسوں میں ان شعبوں میں بہتری آئی ہے۔ حکومت نے توانائی کی قلت پر قابو پانے کیلئے متعدد ادارہ جاتی اقدامات کیے ۔ انہوں نے بتایا کہ صنعتوں کو بلاتعطل بجلی اور گیس فراہم کی جارہی ہے 2018 تک 15 ہزار میگاواٹ بجلی سسٹم میں شامل کردی جائے گی ۔سیمینار میں تحریک انصاف کے رہنما اسد عمر نے پیش کش کی کہ ٹیکس نظام میں بنیادی اصلاحات کیلئے پی ٹی آئی حکومت کی ہر طرح سے مدد کرنے کو تیار ہے ۔ اسد عمر نے تجویز دی کہ محصولات بڑھانے اور ترقی کیلئے ٹیکس اصلاحات اور وصولی کے ادارے خودمختار بنائے جائیں ٗمعیشت دلدل میں پھنسی ہوئی ہے اگر مزید دھنسنا نہیں چاہتے تو سخت فیصلے کرنے ہوں گے ۔وزیراعظم کے معاون خصوصی ہارون اختر نے پیش گوئی کہ اس بار بجٹ میں عوام کو ریلیف ملے گا ۔ ماہر معاشیات ڈاکٹر اشفاق حسین نے بھی محصولات بڑھانے ، روزگار کی فراہمی اور ٹیکس وصولی کے ادارے کو خودمختار بنانے کا مشورہ دیا ۔ ماہر معاشیات ثاقب شیرانی نے کہا کہ صحت اور تعلیم جیسے بنیادی شعبوں پر حکومت کی کوئی توجہ نہیں ۔