کوئٹہ(این این آئی)بلوچستان کے مقامی حکومتوں کے وزیر سردار مصطفی خان ترین کے بیٹے کو مسلح افراد نے ضلع پشین سے اغواء کرلیا۔پشین کے ڈسٹرکٹ پولیس افسر (ڈی پی او) حئی بلوچ نے بتایا کہ نامعلوم مسلح افراد نے بلوچستان کے مقامی حکومتوں کے وزیر کے بیٹے کو پشین میں کیڈٹ کالج سے اغواء کیا ٗ اغواء کار نوجوان کی گاڑی کو کالج کے قریب ہی چھوڑگئے ٗواقعہ کے بعد صوبائی وزیر کے بیٹے کی بحفاظت بازیابی کو یقینی بنانے کیلئے سرچ آپریشن کا آغاز کردیا گیا ٗپولیس اور لیویز فورسز نے مختلف مقامات پر چھاپوں کے دوران اغواء میں ملوث ہونے کے شبہ میں متعدد ملزمان کو گرفتار کرلیا تاہم ڈی پی او پشین نے گرفتار ملزمان کی تفصیلات میڈیا سے شیئر نہیں کیں۔دوسری جانب بلوچستان کے وزیر اعلیٰ نواب ثناء اللہ زہری نے واقعے کا نوٹس لے کر بلوچستان کے پولیس چیف کو صوبائی وزیر کے بیٹے کی بازیابی کیلئے کوششیں تیز کرنے کی ہدایات کردیں۔واضح رہے کہ سردار مصطفی خان ترین عام انتخابات 2013 کے دوران پختونخوا ملی عوامی پارٹی کے ٹکٹ پر پشین سے رکن صوبائی اسمبلی منتخب ہوئے تھے۔