اسلام آباد (نیوزڈیسک)وزیراعظم محمد نواز شریف نے کہا ہے کہ موجودہ حکومت کا اسلوب حکمرانی کا وژن شفافیت اور مستعدی پر مبنی ہے اور ان دونوں پر کوئی سمجھوتہ نہیں ہوگا وہ منگل کو این ایچ اے کے منصوبہ جات کے بارے میں اجلاس کی صدارت کررہے تھے جس میں این ایچ اے کے چیئرمین شاہد اشرف تارڑ نے وزیراعظم کو ملک بھر میں جاری اور آئندہ کے ترقیاتی منصوبہ جات کے بارے میں جامع بریفنگ دی۔ وزیراعظم محمد نواز شریف آئندہ تین ہفتوں کے دوران حویلیاں ۔ تھاکوٹ، ملتان ۔ سکھر، ڈی آئی خان ۔ ہکلہ، لاہور ۔ ملتان اور سیالکوٹ ۔ لاہور موٹر ویز کا سنگ بنیاد رکھیں گے۔ وزیراعظم کو بتایا گیا کہ ان موٹر وے منصوبہ جات کا آغاز کرتے ہوئے انتہائی شفافیت کو یقینی بنایا گیا ہے۔ چیئرمین نے بتایا کہ پاک چین اقتصادی راہداری منصوبہ جات سمیت 800ارب روپے مالیت کے بنیادی ڈھانچے کی ترقی کے منصوبے آئندہ دو سے تین برسوں کے دوران مکمل ہو جائیں گے۔ وزیراعظم نے کہا کہ موجودہ حکومت کا اسلوب حکمرانی کا وژن شفافیت اور مستعدی پر مبنی ہے اور ان دونوں اجزاء پر کوئی سمجھوتہ نہیں ہوگا۔ وزیراعظم نے کہا کہ ملک بھر میں پھیلائے جانے والے موٹر وے کا نیٹ ورک علاقائی رابطے میں معاون ہوگا۔ اس سے ملک بھر میں ترقیاتی عمل زور پکڑے گا، پاکستان کی اقتصادی ترقی میں اضافہ ہوگا اور اس کے نتیجے میں ملک بھر میں روزگار کے مواقع پیدا ہوں گے۔ انہوں نے کہا کہ ان تمام کاوشوں کا مقصد ترقیاتی اور اصلاحاتی ایجنڈے کو عملی جامہ پہنانا ہے جس کا محور پاکستان کے عوام کی ترقی و خوشحالی ہے۔ انہوں نے کہا کہ ہماری کوششوں سے عوام کا معیار زندگی نمایاں طور پر بلند ہوا ہے۔ آج کا پاکستان تین سال پہلے کے پاکستان سے کہیں بہتر اور مختلف ہے۔ ہماری مخلصانہ اور مربوط کوششوں کے نتیجے میں آنے والے برسوں میں زیادہ ترقی پسند اور ترقی یافتہ پاکستان دیکھنے کو ملے گا۔