اسلام آباد(آن لائن)فیڈرل بورڈ آف ریونیو(ایف بی آر) نے آئندہ مالی سال میںمشہور انٹرنیٹ کے سرچ انجن گوگل سے بھی ٹیکس وصول کرنے پر غوروخوص شروع کر دیا ہے ، اورآنے والے دنوں میں گوگل سے ٹیکس وصول کرنے کیلئے حکمت عملی ترتیب دی جائے گی۔ ذرائع کے مطابق فیڈرل بورڈ آف ریونیو (ایف بی آر) انٹرنیٹ کے بہت بڑے نام گوگل سے ٹیکس حاصل کرنے کے طریقے ڈھونڈ رہا ہے، جو مبینہ طور پر پاکستان میں گوگل کاروبار سے حاصل ہونے والی آمدنی پر لیا جائے گا۔ذرائع کا کہنا ہے کہ رواں مالی سال میں ایف بی آر کی جانب سے ٹیکس ریونیو میں اضافے کیلئے بہت سے اقدامات کیئے جائیں گے، اس میں سے گزشتہ کئی عرصے سے تعطل کا شکار انٹرنیٹ کے نام گوگل سے بھی ٹیکس وصولی کی حکمت عملی شامل ہے۔ذرائع کا کہنا ہے کہ ملک بھارت نے بھی دو برس پہلے گوگل پر 760ملین بھارتی روپے کا جرمانہ عائد کیا تھا، اس کی وجہ یہ بتائی گئی تھی کہ گوگل کی جانب سے اپنی آمدنی کم ظاہر کی گئی تھی اور اداروں کو دھوکہ دیا گیا تھا۔ذرائع کا کہنا ہے کہ رواں مالی سال ایف بی آر کی جانب سے پاکستان میں گوگل کی سرگرمیوں کو مانیٹر کیا جائے گا، اور یہ دیکھا جائے گا پاکستان سے گوگل کو اشتہارات کی مد میں کتنا پیسہ مل رہا ہے، ان تمام چیزوں کو مسلسل مانیٹر کرنے کے بعد گوگل پر ٹیکس لاگو کیا جا سکتا ہے، ذرائع نے بتایا کہ اس سے قبل بھی فیڈرل بورڈ آف ریونیو کی جانب سے گوگل سے ٹیکس وصولی کا فیصلہ کیا گیا تھا مگر اس بارے میں لائحہ عمل تیار نہیں کیا جا سکا تھا جس کے باعث یہ کارروائی نہیں ہو سکی، مگر اب آئندہ مالی سال گوگل بھی ٹیکس دینے والوں کی لسٹ میں شامل ہوجائے گا۔