پیرس / دمشق(آئی این پی)عراق اور شام میں برسرپیکار سخت گیر جنگجو گروپ دولت اسلامیہ (داعش) نے پیرس حملوں کی ذمہ داری قبول کرتے ہوئے فرانس کو دھمکی دی ہے کہ اگر اس نے صلیبی مہم جاری رکھی تو اس پر مزید حملے کیے جائیں گے۔غیر ملکی میڈیا کے مطابق شدت پسند تنظیم داعش نے پیرس حملوں کی ذمہ داری قبول کر لی ہے۔داعش نے ہفتے کے روز آن لائن جاری کردہ ایک بیان میں کہا ہے کہ ”آٹھ بھائیوں نے صلیبی فرانس پر یہ حملہ کیا ہے۔انھوں نے بارود سے بھری جیکٹس پہن رکھی تھیں۔یہ بیان عربی اور فرانسیسی دونوں زبانوں میں جاری کیا گیا ہے اور اس میں فرانس کو دھمکی دی گئی ہے کہ اگر اس نے صلیبی مہم جاری رکھی تو اس پر مزید حملے کیے جائیں گے۔بیان میں کہا گیا ہے کہ جمعہ کی رات حملوں کے اہداف کا بڑی احتیاط سے انتخاب کیا گیا تھا۔داعش کے جنگجوئو ں نے پیرس میں نیشنل اسپورٹس اسٹیڈیم اور بٹاکلان کنسرٹ ہال سمیت چھے مقامات پر بم دھماکے کیے ہیں اور وہاں موجود لوگوں پر خود کار ہتھیاروں سے فائرنگ کی ہے۔داعش نے کہا ہے کہ فرانس اپنے لڑاکا طیاروں کے ذریعے خلافت میں مسلمانوں پر فضائی حملوں کا قصور وار ہے۔فرانس امریکا کی قیادت میں داعش مخالف اتحاد میں شامل ہے اور اس کے لڑاکا طیارے گذشتہ ایک سال سے عراق میں داعش کے ٹھکانوں پر فضائی حملے کررہے ہیں اور اس سال ستمبر سے فرانسیسی لڑاکا طیارے شام میں بھی داعش پر بمباری کررہے ہیں۔داعش نے مذکورہ بیان سے قبل ہفتے کے روز ایک پرانی ویڈیو میں بھی جاری کی ہے۔اس میں فرانس کو دھمکی دی گئی تھی کہ اگر اس نے جنگجوئوں پر بمباری جاری رکھی تواس کو حملوں میں نشانہ بنایا جائے گا جبکہ فرانسیسی صدر فرانسو اولاند نے داعش ہی کو پیرس حملوں کا ذمے دار قرار دیا ہے۔