پشاور(نیوزڈیسک) خیبرپختونخوا میں بلدیاتی انتخابات میں پولنگ ختم ہونے کے بعد ووٹوں کی گنتی جاری ہے۔خیبر پختونخوا کے 24 اضلاع میں منعقد ہونے والے بلدیاتی انتخابات میں 41 ہزار 762 نشستوں پر 84 ہزار 420 امیدوار مدمقابل ہیں۔ صوبے بھر کے ایک کروڑ 30 لاکھ سے زائد رجسٹرڈ ووٹرز کے لئے 11 ہزار 200 سے زائد پولنگ اسٹیشن قائم کیے گئے۔پولنگ کا عمل صبح 8 بجے شروع ہوا جو شام 5 بجے تک بغیر کسی وقفے کے جاری رہا، انتخابی عمل کے دوران کسی بھی ناخوشگوار واقعے سے نمٹنے کے لیے صوبہ بھر میں ایک لاکھ سے زائد سیکیورٹی اہلکار تعینات کیے گئے۔صوبے بھر میں پولنگ کے دوران صورت حال پر امن رہی تاہم بعض مقامات الیکشن کمیشن اور مقامی انتظامیہ کی بدانتظامی کی بدولت ناخوشگوار صورت حال بھی دیکھنے کو ملی، مختلف اضلاع میں پولنگ کا سامان اور عملہ وقت پر نہ پہنچنے کے باعث ووٹنگ کا عمل تاخیر سے شروع ہوا جس پر امیدواروں نے احتجاج کیا جب کہ صوابی اور ہری پور میں قبائلی عمائدین نے خواتین کو ووٹ ڈالنے سے روک دیا۔ کئی مقامات پر امیدواروں نے انتظامیہ اور پولیس پر سیاسی جماعتوں کی حمایت کا بھی الزام لگایا۔ کئی مقامات پر ووٹر بیلٹ پیپر لےکر پولنگ اسٹیشن سے باہر لے آئے تو کہیں خواتین کے پولنگ اسٹیشنز میں مرد موجود پائے گئے۔ یوسی31 کے وارڈ 2 میں جنرل کونسلر کا بیلٹ پیپر غائب ہوگیا جب کہ یوسی ون پہاڑی پورہ میں بیلٹ پیپر پر کسان مزدور امیدوار کا انتخابی نشان ہی موجود نہیں تھا۔ ایبٹ آباد کی یو سی نملی میرا اورکتھوال کے بیلٹ پیپرز پر جنرل اور کسان کونسلر کے انتخابی نشانات ہی غائب تھے، مانسہرہ میں بدنظمی کے باعث کئی جگہوں پر پولنگ روک دی گئی ،صورتحال کو کنٹرول کرنے کیلئے فوج کو طلب کرلیا گیا اس کے علاوہ پشاور، نوشہرہ، چارسدہ، دیر اور دیگر علاقوں میں سیاسی کارکنوں کے درمیان ہاتھا پائی اور فائرنگ کے واقعات بھی رونما ہوئے جس کی وجہ سے ایک شخص ہلاک جب کہ 18 زخمی ہوگئے۔