اسلام آباد(نیوزڈیسک) وزیر اعظم میاں محمد نواز شریف اور آرمی چیف جنرل راحیل شریف نے آئی ایس آئی ہیڈ کوارٹر کا دورہ کیا ، وزیراعظم نے دہشت گردی کے خلاف خفیہ ادارے کی کارکردگی کو سراہا اور تسلی بخش قرار دیا۔ ڈی جی آئی ایس پی آر میجر جنرل عاصم باجوہ نے سوشل میڈیا پر اپنے پیغام میں بتایا کہ وزیر اعظم اور آرمی چیف کو انٹیلی جنس ایجنسیوں کی دہشتگردی کیخلاف کارروائیوں پر بریفنگ دی گئی اور حکام کو ملک کی اندرونی اور بیرونی سیکیورٹی صورتحال سے آگاہ کیا گیا۔ ذرائع کے مطابق وزیر اعظم نے پاکستان کو غیرمستحکم کرنے میں بیرونی ہاتھ کے ملوث ہونے پر تشویش کا اظہار کیا اور کہا کہ اس چیلنج کا مل کر مقابلہ کریں گے۔ وزیراعظم کا کہنا تھا کہ دشمن کتنا ہی طاقتور کیوں نہ ہوں ہم مل کر اسے شکست فاش دیں گے اور ملکی سلامتی کو یقینی بنائیں گے۔ وزیر اعظم نے بھارت کی جانب سے دہشتگردی کے بیان پر انتہائی تشویش کا اظہار کرتے ہوئے کہا کہ ہم ملک کو محفوظ بنانے کے لیے ہر ضروری قدم اٹھائیں گے۔