اسلام آباد(نیوز ڈیسک)لاہور کے علاقے شاد باغ میں شارٹ سرکٹ کے باعث لگنے والی آگ سے ایک ہی خاندان کے 6بچے جن میں 3بیٹے اور 3بیٹیاں شامل تھیں، جھلس کر جاں بحق ہوگئے ۔ بچوں کی عمریں ڈیڑھ سے بارہ سال کے درمیان تھیں۔ تفصیلا ت کے مطا بق لاہور کے علاقے شاد باغ میں شیر شاہ روڈ پر ایک 3منزلہ گھر کی نچلی منزل کے ایک کمرے میں شارٹ سرکٹ کے باعث آگ لگ گئی، جہاں 3بچے سوئے ہوئے تھے، جو موقع پر ہی جاں بحق ہو گئے۔ اسی اثنا میں آگ نے اوپری منزل کو بھی اپنی لپیٹ میں لے لیا، جہاں 3بچے جھلس گئے، انہیں اسپتال پہنچایا گیا، مگر وہ جانبر نہ ہوسکے۔آگ لگنے سے جاں بحق ہونے والوں میں11سالہ زین،8 سالہ دعا ، 5 سالہ انہان ، 5 سالہ مناہل ، 2 سالہ اذلان اور 2 سالہ اذان شامل ہیں۔ اہل محلہ نے الزام عائد کیا کی ریسکیو ٹیمیں بر وقت اطلاع کے باوجود تاخیر سے پہنچیں، ورنہ اوپری منزل پر سوئے بچوں کی جان بچائی جا سکتی تھے۔ پولیس نے موقع پر پہنچ کر تحقیقات شروع کر دی ہے۔دریں اثناءجھلس کر جاں بحق ہونے والے چھ بچوں میں سے تین بچوں کی نماز جنازہ ادا کر دی گئی۔ ایک ہی گھر سے میتیں اٹھنے پر علاقے میں کہرام مچ گیا۔ جب میتیں صبح گھر پہنچیں تو رشتہ دار پھوٹ پھوٹ کر رونے لگے۔ تین بچوں کی اجتماعی نماز جنازہ قریبی گراو¿نڈ میں ادا کی گئی جس میں اہل علاقہ کی بڑی تعداد نے شرکت کی۔ اس موقع پر رقت آمیز مناظر دیکھنے کو ملے۔ بچوں کی المناک موت سے ہر آنکھ اشک بار اور ہر چہرہ غمگین تھا۔