اسلام آباد(نیوزڈیسک)پاکستان تحریک انصاف نے جوڈیشل کمیشن کی جانب سے پوچھے گئے سوالات کے تحریری جواب میں شواہد پیش کرنے سے معذوری کا اظہار کردیا ہے۔مبینہ انتخابی دھاندلی کی تحقیقات کرنے والے جوڈیشل کمیشن میں جمع کرائے گئے جواب میں تحریک انصاف نے کہا ہے کہ مسلم لیگ (ن) ہر صورت میں انتخابات جیتنا چاہتی تھی، جس کے لئے ن لیگ نے انتخابات کے لئے باقاعدہ سیل بنایا، 2013 کے عام انتخابات میں منظم دھاندلی کا منصوبہ بنایا گیا جو پنجاب، سندھ اور بلوچستان تک محدود تھا، منصوبہ سازوں نے دھاندلی کے منصوبے پر عمل درآمد سے متعلق مسلم لیگ (ن) کی قیادت کو آگاہ کیا تھا۔جواب میں مزید کہا گیا ہے کہ مسلم لیگ (ن) کی منظم دھاندلی کے منصوبے میں ریٹرننگ افسران نے ہر ممکن مدد فراہم کی، باقی جماعتیں اور افراد بھی دھاندلی میں شریک ہوسکتے ہیں تاہم عام انتخابات میں دھاندلی کی اصل منصوبہ ساز مسلم لیگ (ن) ہے۔ دھاندلی کے الزامات سے متعلق 74 قومی اور صوبائی اسمبلیوں سے متعلق مواد جمع کرائے جاچکے ہیں جوڈیشل کمیشن نجم سیٹھی اور انتخابات کے وقت کے چیف سیکرٹری پنجاب کو طلب کر کے جرح کرے۔دھاندلی سے متعلق شواہد سے متعلق سوال پر تحریک انصاف نے اپنے تحریری جواب میں شواہد فراہم کرنے سے معذوری کا اظہار کرتے ہوئے موقف اختیار کیا ہے کہ تحریک انصاف الزامات سے متعلق ممکنہ حد تک ثبوت فراہم کر چکی ہے تاہم شواہد تک رسائی نہیں رکھتی، اس لئے انتخابی ریکارڈ کی معائنہ رپورٹ اور خصوصی تحقیقاتی ٹیم کے نتائج پر بھی انحصار کیا جائے گا۔ اس کے علاوہ دوسری سیاسی جماعتوں کی جانب سے پیش کیے گئے شواہد پر انحصار کرنے کا حق بھی رکھتے ہیں۔