اسلام آباد(نیوز ڈیسک)وزیراعظم میاں محمد نوازشریف نے کہاہے کہ پاکستان اور افغانستان کے درمیان بڑھتا ہواسیکیورٹی و دفاعی تعاون تسلی بخش ہے اورآرمی چیف جنرل راحیل شریف کے افغانستان کے حالیہ دوروں سے معاملات کو بہتر ومضبوط بنانے مدد ملے گی۔ان کا کہنا ہے کہ پاکستان کی توقع ہے کہ افغانستان کے اندر امن مذاکرات جلدازجلد کامیابی سے ہمکنارہوں۔ وزیراعظم نوازشریف سے افغان سفیر جانان موسی ٰ زئے نے وزیراعظم ہاﺅس میں ملاقات کی، جس میں دونوں ملکوں کے درمیان تعلقات اور مختلف امور پر تبادلہ خیال کیا گیا۔ وزیراعظم نوازشریف نے کہاکہ موجودہ حکومت میں پاک افغان تعلقات بہتری کی گامزن ہیں، مشکل کی گھڑی میں ہمسایہ برادر ملک کے ساتھ کھڑے ہیں،کسی بھی قسم کی مزید مدد کیلئے تیار ہیں، امید ہے کہ افغانستان میں امن مذاکرات کے عمل میں تیزی آئیگی اور توقع ہے کہ امن مذاکرات جلدکامیاب ہونگے۔نوازشریف نے کہاکہ پاک افغان بین الوازارتی اجلاسوں کے فیصلوں پر فوری عمل کیلئے فوکل پرسن تقرر کردیا ہے اورافغانستان بھی اپنا فوکل پرسن مقرر کرے۔انہوں نے کہاکہ پاک افغان جوائنٹ بزنس کونسل کا پہلا اجلاس آئندہ چند ہفتوں میں بلاکر غیرملکی سرمایہ کاروں کو راغب کرینگے۔افغان سفیر نے وزیراعظم سے گفتگو میں بتایاکہ حالیہ برفانی طوفان میں پاکستان کی مدد وتعاون کے تہیہ دل سے شکرگذار ہیں،خاص طور پروزیراعظم کی جانب سے مشکل کی گھڑی میں افغان صدر اور عوام کے نام ہمدردی کے پیغام پر ممنون ہیں،ملاقات میں افغانستان اور پاکستان کے درمیان کاسا 1000 پاور ٹرانشمن کے منصوبے پر بھی بات چیت کی گئی۔