کراچی (نیوز ڈیسک)جامعہ کراچی میں امریکی قونصل جنرل رچرڈ اولسن نے ٹیچر ایجوکیشن کی بلڈنگ کا افتتاح کیا۔ تقریب سے خطاب کرتے ہوئے امریکی سفیر کا کہنا تھا کہ تعلیمی اداروں میں بحالی کے لئے امریکی حکومت پینتالیس ملین ڈالر فراہم کر رہی ہے۔ٹیچر ایجوکیشن کی بلڈنگ کے افتتاح کے بعد امریکی قونصل جنرل رچرڈ اولسن نے خطاب میں کہا کہ یہ عمارت بہترین تعلیمی ادارے تشکیل دینے کے سلسلے میں دونوں ممالک کے مشترکہ عزم کی روشن مثال ثابت ہو گی۔ امریکہ پاکستان کے ساتھ ملکر ملک میں اساتذہ کی تربیت کا معیار بہتر بنائے گا۔ ان کا کہنا تھا کہ امریکی حکومت مستقبل کے اساتذہ کو بہترین سہولیات فراہم کرنے کے لئے مصروف عمل ہے جبکہ یو ایس ایڈ پروگرام کے تحت پاکستان بھر میں جدید سہولیات سے آراستہ ڈپارٹمنٹ آف ایجوکیشن کی سترہ نئی عمارتیں تعمیر کی جائیں گی۔ ان کا کہنا تھا کہ امریکی حکومت کے مختلف تعلیمی منصوبوں سے اب تک چودہ ہزار سے زائد پاکستانی اساتذہ فائدہ اٹھا چکے ہیں۔